Ranji Trophy: Watla lehkai bha u Jaskirat, shah rem ka Meghlaya da ka Inning bad 81 ron ha ka Hyderabad

Shillong, Kyllalyngkot 13: Ka kynhun ïalehkai kriket jong ka Hyderabad ka la jam shakhmat ban khur ïa ka jingjop da ka inning bad 81 ron ha ka jingïakhun pyrshah ïa ka Meghalaya ha ka lympung lehkai jong ka Ranji Trophy plate group kaba la long ha MCA Ground hynnin ka Sngi Saitjaiñ.
Haba phai sha ka sngi ïakhun ba nyngkong, ka Meghalaya ka la shah pynhap noh hadien 111 ron katba ka Hyderabad ka la lah banh tied 182/4. Hynne ka step, u KR Rayudu (u ba la tied 54 shuwa ban bteng) u la lah ban ïalehkai bha ban kynjoh ruh sha ka spah ron. u la duh noh ïa u paralok, u Pragnay Reddy ( 2 naki 32) haba bteng biang ïa ka inning ba nyngkong hynrei u la lah ban pynneh ban kyntiew ron ryngkat bad u Tanay Thyagarajan (35) bad u CV Milind (50 not out).
Ka Hyderabad ka la khyriwt haduh 164 ron na ki 33 over tang ha ka por step. Kane ka kynhun ka la lah ban kynjoh sha ka 346 ron hap 7 wicket shuwa ban wai bam. U Rayudu,u wei napdeng ki rangtied ka liang pyrshah u la lah ban ïalehkai bha bad khur syndon ruh ïa ka nam Player of the Match, da ka jinglah ka jong u ban khyrwit sha lait ïa ki bol kiba la poi shaduh ka Wahumkhrah. U la pyndep ïa ka inning khlem da shah pynhap, kata ban kynjoh 124 naki 216 bol (12x4s, 3x6s).

Ka long kaba eh ïa ka Meghalaya ban pynneh ïa ka mynsiem ïakhun namar ka jingshyrkhei jong ki rangtied ka liang pyrshah. Hynne u Ram Gurung (3/55), Swarajeet Das (3/75) bad u Dippu Ch Sangma (1/61) ki la ïoh ban ïasam wicket kiba ka kynhun ka la ïoh ban pynhap, ha kaba arngut napdeng jong ki ki la ïoh mar 3 wicket.
Hadien kane, ka Meghalaya ka la sdang ïa ka inning tied kaba ar bad ka donkam ban kamai 245 ron tang ban pynlong ‹a ka Hyderabad ban tied biang sa shi sien.
Ka Hyderabad ka la lah ban lehkai bha da kaba khur lai wicket kiba hakhmat jong ka Jylla. Hadien kane, ka Meghalaya ka la sdang ban kyntiew ïa ka ron hadien ba mih u Kishan Lyngdoh, ryngkat bad u Tarique Siddique. Kine ki shijur ki la lah ban kyntiew 62 ron na bynta u wicket ba saw shuwa ba u Tarique (15 naki 41) u la shah pynhap lyngb aka run out.
U Kishan (47 naki 56, 9x4s) u la shah pynkut noh ha kajuh ka over, tang hadien ba ka kynhun ka la kynjoh 80/5.
Na ka liang jong u Jaskirat u ba la tied 11 tylli ki four ban kamai 53 na ki 39 bol. Hynrei u la shah pynhap noh ha u Saaketh (1/19).
Ka kynhun Meghalaya kan dang hap pynkhreh ïa ka jingïakhun ban long biang ha nongbah Shillong, ka ban long pyrshah ïa ka Nagaland ka ban sdang ha ka 19 mynta u Kyllalyngkot.