Jied ka INDIA Bloc ïa U Mallikarjun Kharge kum u Chairperson, pynkhreh ïa ka elekshon MP

Shillong, K’lyngkot, 13: U Nongïalam jong ka seng Congress u Mallikarjun Kharge, u la shah jied kum u Chairperson jong ka INDIA bloc, kaba long ka shatri jong ki Seng Saiñpyrthei kiba shong ha ka liang pyrshah.
Ka jingjied ïa u Kharge kum u nongïalam jong ka INDIA Block ka long shwa ba ka ri India baroh kawei kan leit sha ka elekshon Lok Sabha ka ban sa long, bad kane ka pynpaw pyrthei ruh ïa ka jingïatylli jong ki seng saiñpyrthei kiba don ha ka Liang Pyrshah ban ïakhun pyrshah ïa ka BJP.
Ïa u Kharge la jied kum u nongïalam ka kynhun haka jingïalang ba la ïashim bynta da ki nongïalam ba hakhmat eh jong ka INDIA bloc.
Ha kane ka jingïalang, la ïathir ïatai halor kiba bun ki mat kum ha ka jingïabhah ïa ki Seat bad ïa ka jingïashim bynta ha ka Bharat Jodo Nyay Yatra, ka ban sa long kawei na ki jingïalap paidbah jong kane ka kynhun ka ban khring ïa ki nongthep vote.
Ha kawei pat ka liang, la jied ïa u Myntri Rangah jong ka Bihar Nitish Kumar kum u Convener jong ka INDIA bloc.
Hynrei, u Kumar u la kyntait mardor ban shimti ïa kane ka kam da kaba ai jingmut ban jied ïano re ïano na ka Seng Congress ban shim ïa kane ka jingkitkhlieh. Kane ka rai jong u ka long hadien ba ka la don ka jingïakren bad kiwei pat ki seng saiñpyrthei kiba don lang hapoh ka kynhun. La ïoh jingtip ba ka JD(U) ha kaba sdang ka la tyrwa ïa u Kumar ban long u Convenor hynrei la pyrshah da ka TMC.
Da kane ka jingïatylli jong ki seng saiñpyrthei kiba don hapoh ka Liang Pyrshah kan buh jingeh bha ïa ka Sorkar NDA ba mynta ba ïalam da ka BJP.
U Mallikarjun Kharge kum u briew uba la ih bha ha ka saiñpyrthei un hap ban pyni ïa ka jingtbit jong u ban long kum u nongïalam jong ka INDIA bloc ha kane ka kynti.
Katba ki sngi ki la nang tyllun sha ka elekshon, baroh ki khmat mynta ki phai sha ka INDIA bloc bad sha u nongïalam ba thymmmai u Mallikarjun Kharge, ban peit ruh haduh katto kane ka kynhun ka lah ban ïoh jingkyrshan na ki paidbah bad ban ïakhun pyrshah ïa ka bor jong ka BJP ha ka elekshon ka ban sa long.