Ha syndah ka Law Kyntang ha Mawphlang yn ai jingkren ka President ka ri India sha paidbah

Shillong, Kyllalyngkot 13: Ka jingpynkhreh ïa ka jaka ban pynlong ia ka jingïalang paidbah ka President ka Ri India ka Droupadi Murmu ha syndah jong ka Law Kyntang ha Mawphlang ka la ïaid sha khmat haduh mynta ka sngi ban pynïeng ïa ka rynsan ban pynlong ïa ka jingïalang paidbah.
Ka jingsiang ïa ki maw ha lynti ban ïaid ka Presdient la lah ban pyndep mynta ka sngi bad ka jingpynbha ïa ka surok na duh Lat Mawreng sha duh Lawkyntang la pyndep mynta ka sngi da ki kontraktor kiba ïoh ban pyntrei ïa kane ka jingsiang rong ïa ka surok.
Ban pyni ïa ka jingkhuid jingsuba ha shilynter ka surok na duh Umshyrpi haduh Mawphlang mynta ka sngi la buh ïa shibun ngut ki briew baroh shilynter lynti ban pynkhuid ïa ki plastik kiba bret pathar da ki paidbah baroh shi katta.
Ha kane ka sngi la ïohi ruh ba ki heh pulit jong ka jylla ki la ïadon ha Madan ha jan ka law kyntang ha Mawphlang ban peit ïa ka jingshngaiñ jong katei ka jaka ha kaba ki briew da ki spah ngut kin don ha katei ka jaka ban pynkhreh ïa ki rynsan bad ïa ka dara ban shong ki paidbah.