Shillong, K’Lyngkot 13: Ka Hynniewtrep Youth Council (HYC) bad ka NEHU Student Union (NEHUSU) mynta ka sngi ki la pynbna ban weng noh ïa ka jingïakhih kaba la pynbeit ban pynlong ha ka 15 tarik mynta u bnai.
Lah ban kdew ba ka HYC bad ka NEHUSU ki la pynbeit ban pynlong da ka jingïakhih da kaba ïaid paidbah na Motphran shaduh Secretariat hadien ka jingslem ka Sorkar Jylla ban pyllait ïa ka Scholarship ki samla pule.
Ka jingweng noh ïa kane ka jingïakhih ka dei namar ka Sorkar Pdeng ka la pyllait T.41.25 klur sha ka Meghalaya na ka bynta ban siew ïa ka Post Matric Scholarship 2022-2023.
Haba kren ha kane ka sngi u Secretary ka Education Cell ka HYC, u samla Enlang Sawiang ula ong ba ki samla pule ki la weng ïaka jingïakhih hynrei ki ai por artaiew ïa ka Sorkar Jylla ban pynpoi ïa ka pisa sha ki Bank Account ki samla pule kiba dei ban ïoh ïa ka Scholarship.
“Watla, ngi la pynbna ban weng noh ïa ka jingïakhih hynrei ka Sorkar Jylla ka dei ban pynthikna ba ka pisa kan poi sha ki Bank Account jong ki samla pule hapoh artaiew” la ong u samla Enlang.
U samla Enlang ula kyntu ruh ïa ka Sorkar Jylla ban shim ka jingkitkhlieh ban pynthikna ba nangne shakhmat, ka Scholarship ki samla pule ka Jylla kam dei shuh ban slem, kum mynta ka kynti.
Ula dawa ruh na ka Sorkar Jylla khamtam na u Myntri ka tnat pule puthi ban ïakren bad ka President ka Ri India ka Droupadi Murmu halor ka jingdonkam ban kyntiew ïa ka jingpule hapoh ka skulbah NEHU.
