Shillong, KyllaLyngkot 14: Ka Galaxy Lummawbah ka la ioh ban khur ïa ka nam lahduh ryngkat ka song pisa ba 20,000 tyngka hadien ba ka la ioh ban pynliem noh ïa ka Super Striker da 1-0 kol ha ka final football ban kynmaw burom ïa u MP barim ka jylla u Ma Jerlie E Tarïang bamkwai ha dwar u Blei.
Ïa kane ka lympung ïalehkai ba tip kum ka 1st Jerlie E Tariang Memorïal Knock-Out Football Tournament kaba la pynlong ha madan ïalehkai jong ka Shonroy Basan School, Lummawbah (Parmaw) la pynïaid bad pynbit pynbïang da ka Sainborlang Banjop Welfare Assocïation.
La pynhap pyrda ïa kane ka lympung da ka khun jong utei u MP barim i Padmashree Badaplin War ryngkat ka jingdonlang ki nongïalam ka Assocïation kynthup ïa u Bah Balajied Kharmalki, Bah Gilbert Laloo bad kiwei kiwei.
La donlang ruh ka Chairperson barim ka KHADC Kong Teilinïa Thangkhiew kumjuh u Assistant Secretary Shnong Bah R Khongwir nalor ki riew rangbah ka shnong bad ki paidbah nongpeitkai.
Ïa ka khusnam best player ha kane ka lympung la ïoh da u Rickymond Muktieh ka Super Striker katba ïa ka khusnam ba ioh thep kol bun eh la ioh da u Ïari Shanpru na ka Galaxy bad ïa ka khusnam nongap kol ba kynsai la ïoh da u Wallam Khongshun jong ka Super Striker.
