Btin lynti ka Jongksha Grassroots Football Centre ïa ki heprit ban pyntbit ha ka ïalehkai phutbol
Shillong, Kyllalyngkot 14 : Ka Jongksha Grassroots Football Centre ha ka 12 tarik Kyllalyngkot 2024 ka la pynlong ïa ka jingpynïalehkai kynjatbol na ka bynta ki hep kiba rit ïa kaba la tip kum ka Winter Football Tournament 2024.
Ïa kane ka tournament ba shi sngi la pynlong ha madan kynjat bol jong ka shnong Jongksha ha kaba la wan ban sakhi lang u Sorkar ka Shnong Jongksha u Bah Olet Kharsahnoh kum u kongsan, Bah H. Suting, K. Songthiang, T. Kharsahnoh kiba dei ki coach jong ka Jongksha Grassroots Football Centre bad ki kmie ki kpa jong ki heprit.
Ha kane ka tournament la ïashim bynta da ki saw tylli ki kynhun ba kynthup ka Combined United Football Club, Al Nassr Football Club, Jongksha Lajong Football Club bad ka Liverpool FC. Ka Al Nassr Football Club ka la khur jingjop da kaba pynliem ia ka Combine United FC da 1-0 kol ha ka jingïalehkai kaba nyngkong katba ka Jongksha Lajong FC ka la khur nam jop da kaba pynliem ïa ka Liverpool FC lyngba ka jingïashut penalty hadien ba ki la ïakhaid mar shi kol ha ki minit ïalehkai.
Hadien ba la kut ki jingïalehkai la sam ïa ki khusnam sha ki kynhun ba jop bad ba wan ba ar lyngba ki syrnot bad ki medal.
Ha kane ka sngi la pynshongshit ruh lyngba ki jingshad na ki heprit, ka puron jong ka phlim Khohwah Nongsor ka samla Risha Mynsong ryngkat ki paralok kiba la pynshohbiej ïa ki heprit bad ki kmie ki kpa da ka jingrwai na ka phlim Dhaka Escape.
Ka Jongksha Grassroots Football Centre ka la sam ruh ïa ki Jersey sha ki heprit kiba ïashim bynta ha ka jingïalehkai.““U Bah Olet Kharsahnoh haba kren kum u kongsan u la ai khublei ia kane ka grassroots centre kaba la pynlong ia kane ka jingïalehkai bad kyntu kynpham ruh ka ki heprit ba kin long kiba smat ba sting ban kohnguh sneng bad ban pyndonkam hok ia ka sap ïalehkai.“
La iohi ba ba ha kane ka sngi ki kmie ki kpa bad kiba haïing hasem ki da kmen shi katdei eh ban ïohi ïa la ki jong ki khun ba ki ïalehkai bad pynpaw ïa la ki jong ki sap hapdeng madan.
Shuwa ban sdang ka jingïalehkai ki heprit ki la shim ka jingbam smai. Bad ïa kane ka prokram la pynïaid da u samla Welbon Mynsong.
Ka Jongksha Grassroots Football Centre ka la lah ban pynïaid shaphrang ïa kane ka jingpynïalehkai lyngba ka jingkyrshan borbah ka Yess Meghalaya kaba dei kawei na ki shnat treikam jong ka sorkar Jylla kaba ju ïarap kyrshan pisa ïa ki samla kiba pynlong ïa ki jait prokram bapher bapher, kynthup ruh ha ki jingialehkai.