Rakhe World Mental Health Day ka skul Pahsyntiew Memorial SS, Nongkrem
![](https://mawphor.com/wp-content/uploads/2022/05/mawphor-1.jpg)
Shillong, Risaw 10: Mynta ka sngi (10 tarik Risaw) ka dei ka sngi kyrpang ha kaba ka pyrthei baroh shityllup ka rakhe ïa ka World Mental Health Day, kaba long shi bynta ban pynkynmaw ia ka jingdonkam ka koit ka khiah ha kaba iadei bad ka bor pyrkhat pyrdaiñ jong uwei pa kawei na ki briew.
Ha kane ka sngi 10 tarik bnai Risaw 2023, ka skul Pahsyntiew Memorial Secondary School, Nongkrem ka lah ïohlad ban rakhe ïa kane ka sngi kyrpang ha ryngkat ka jingïadon lang ki briew kiba wan na ka ophis treikam jong ka Block Mission Co-ordinator, Mawryngkneng, Block, ki khynnah skul bad ki nonghikai.
I kong Christina Kharbuli iba dei i Special Educator jong ki Child With Special Needs (CWSN) bad kumjuh ruh i Kong Melinda Khriam bad i Kong Kerlinda Kharumnuid kiba dei ki Inclusive Education (IE) jong ki CWSN kila wan ban ai ka jinghikai ha kaba ïadei bad kane ka sngi kyrpang sha ki khynnah jong ka skul.
I kong Ridalin Laloo iba dei iwei na ki teaching staff bad kumjuh i School Counsellor i la iohlad ban ai jinghikai lane ka awareness na ka bynta ki khynnah skul bad kumjuh ïa ki nonghikai jong kane ka skul. I la ong, “Ba kum ki nonghikai ngi dei ban long kiba kloi ban ïarap ïa ki khynnah ha kaba ki ïakynduh ki jingeh ha ka jingim ka jong ki”. I la pynkynmaw ba ha ka juk kaba mynta ki khynnah pule ki donkam ïa kane ka subjek ban ïakren bad ki khynnah skul na ka bynta ka jingbha ba kin lait na kiei kiei ki bor pyrkhat pyrdaiñ kiba sniew kiba lah ban ktah ïa ka pule puthi bad kumjuh ïa ka lawei jong ki khynnah skul”.