Ba leh thombor bad knieh jubor ïa ki marbam da ki shipai BSF ha Bagli, sha u DC leit ujor ka KSU

Mawkyrwat, Risaw 10: Ka Khasi Student’s Union (KSU) jong ka South West Khasi Hills District, da ka jingsngewkhia halor ka jingshah pyndik jong ki nongkhaïi kiba dei ki khasi ha ka thaiñ Bagli ha ki Border Security Force ne BSF mynta ka sngi ryngkat ka jingthoh ki la leit ban ujor ha u Deputy Commissioner jong ka South West Khasi Hills District.
Ha ka kot jingujor ba ka seng ka phah ha u Deputy Commissioner, South West Khasi Hills District ki la pynpaw ba ki shipai Border Security Force (BSF) jong ka Bagli Border Outpost ha ka 28/09/2023 ha ka por 4:30 baje janmiet ki la rung jubor ha ka dukan jong ka kong Tilian Lyngdoh Lyngkhoi kaba don ha Bagli, South West Khasi Hills District.
“Kine ki shipai ki la knieh jubor ruh ïa ka shini kumba 45 byrni ei ei da kaba kynnoh ba ka dei kaba mut ban khaïi beaiñ sha Bangladesh hynrei ka jingshisha ka long ba kam shym don kaba kum kata ka jingthmu naba ïa ki mar dukan la ju die beit tang ha ki nongshong shnong jong ka thaiñ Bagli”, ong ba khubor. Kawei pat ki la ong ba lada kheiñ antad ïa ka shini ba kine ki BSF ki la knieh jubor na kane ka dukan ka la poi kumba 2250 kgs ei ei. Namarkat, ka la pynduhnong shikatdei eh ïa kane ka nongkhaïi ba ju kamai jakpoh da kaba buh dukan ha kato ka ïew.
La ong ruh ba ka jingkynnoh jong ki shipai BSF ka long kaba khlem nongrim, ka bym shongñia, ka jingpharep jubor bad ka dei ka jingkhñiot beiñ ïa ki rit ki ria naba ka jingknieh jubor ïa kane ka shini kam dei haka por ba mut ban kit sha Bangladesh hynrei la shu shim suk na ka jaka ba buh hapoh dukan. Kumta, na ka liang ka trai dukan ka la pyrshang ban ïa said bad pyni nia da kaba ïathuh ïa ka jingshisha kumba ka long da ka jingthmu ban ïoh biang ïa kita ki mar ba la shu knieh jubor khlem nongrim phewse, na ka liang ki shipai ki la jubab da kaba ai daw ba ki la aiti ha ka tnad Custom katba ka jingshisha ka long ba kim shym la aiti ha ka tnad Custom hynrei ki la die kylla ïa kata ka shini sha kiwei pat ki briew.
Haba ïoh ban kren bad u bah Shimbor Lyngdoh uba dei u trai dukan ba ki shipai BSF ki la thombor ha ka 28 tarik u Nailur 2023 da kaba ki wan knieh ïa ki shini na dukan jong ki kumba 45 byrni kaba shongdor kumba T. 96 hajar ei ei, u la ong ba kane ka jingleh jong ki BSF ka dei ka sien ba nyngkong naduh ba ki la shong dukan ha Bagli la kumba 10 snem ei ei. “Ka jingleh jong kine ki shipai BSF khlem kano kano ka daw ka la pynlyngngoh ïa ki trai dukan namar ma ki kim shem don kano kano ka jingshalan ïa u shini shabar jong ka Ri hynrei ka dei tang ba ki die hi tang hapoh kane ka ïew Bagli kata tang hapoh ka jingshynshar ka Jylla Meghalaya ne hapoh la ka jong ka Ri India”, ïathuh u bah Shimbor.
Namarkata, halor kitei ki jingshahthom bor jong ki nongkhaïi, ka seng ka sngew ban kyntu ïa ki bor dei peit bad kumjuh ruh ïa ka ophis jong u Deputy Commissioner, South West Khasi Hills District ba kan bthah ïa ki shipai BSF jong ka Bagli Border Outpost ba ki dei ban pynphai ne siew da ka pisa sha kane ka trai dukan kaba la duh nong na ka jingshah knieh jubor bad shah pharep jubor ha ki BSF bad wat ban register mukotduma ruh ïa ki halor ka jingshim kabu da kaba pyndonkam bakla ïa ka aiñ bad kawei de ban khot ruh ïa ki shipai BSF ban don ka jingïakren ryngkat ka jingdonlang jong ka seng ne kum ka Joint Meeting khnang ba kiba kum kine ki jingshah pyndik kin nym jia shuh nangne shakhmat.
Ha kane ka jingleit ban ïakynduh ïa u Deputy Commissioner, South West Khasi Hills District la donlang naduh u Forwardman Nongrem, President bad Jiedskhem Nongsiej, General Secretary jong ka KSU South West Khasi Hills District.