Nongpoh, Naitung 01: Ka skulbah University of Science & Technology Meghalaya, ryngkat ka PA Sangma International Medical College & Hospital bad IA Ayurvedic Medical College, mynta ka sngi kila rakhe ïaka National Doctor’s Day 2026 kum ka dak ka jingburom ïaka jingshakri ki doctor kum ki shipai ba hakhmat ha kaba ïadei bad ka koit ka khiah, halor ka phang Behind the mask: who heals the healer? haka jingïalang kaba la long ha katei ka skukbah.
Ha kane ka sngi la wan ruh ban sakhi da u Mahbubul Hoque, Chancellor ka USTM, Prof GD Sharma Vice Chancellor, Padma Shri Dr Sarbeswar Sahariah, Prof. (Dr.) A.C. Kataki, Pro Vice Chancellor, USTM, Dr. Jogesh Sharma Director, Medical Administration, USTM, (Dr.) H.K. Sharma Director, Medical Education & Research, PIMC, Dr. Anil Kumar Sharma Principal, PIMC, ki doctor bala kham rangbah, ki samla pule doctor bad kiwei kiwei.
Kum ka jingsngewnguh ïaka kam ba ki doctor ki ai ka jingshakri la pynkup burom ruh ïaki doctor rangbah bad ki nonghikai halor u synñiang u bynhei ba kila noh haba ïadei bad ka koit ka khiah bad kumjuh ruh ïaki doctor ba nyngkong kiba la don bynta ban seng bad pynurlong ïaka PA Sangma International Medical College & Hospital.
Naka liang ki nongkren ha kane ka sngi kila ong ba ki doctor ki dei ki shipai ba hakhmat eh haba ïadei kumno ban kynduh nyngkong ïaki nongpang bad ki jait jingpang bapher bapher bad kumno ban sumar bad wadlad ban pynbha ïa katei ka jingpang namar ka jingjop ki doctor ka dei kaba ki lah ban pynkhiah ïa kano kano ka jait jingpang ryngkat ka jingkyrmen ba katei ka jaka pule doctor bad jaka sumar kaba don ha USTM kan nang kiew shaphrang ryngkat ki kor ki bor bad ki rukom sumar katkum ka juk mynta bad lyngba ka Super Spciality Health Care ka ban sa wan.
Ha kane ka sngi kum shibynta ka jingrakhe ïaka sngi ki doctor la sam ruh ïaki Premium Health Card sha ki nongthohbor, ha kaba ki nongthoh khubor kin ioh ka jingsumar haka dor kaba duna ha katei ka hospital naduh ka jingsumar, ki dawai halor ka jingshakri jong ki sha ka imlang ka sahlang.
