Rakhe ka shnong Kongthong ïa ka Seva Pakshwada ka sngi kha u Narendra Modi

0

Shillong, Risaw : Kum ka dak ka jingrakhe ïa ka taïew ba khatduh ïa ka jingpyndon burom ïa ka Sewa Pakshwada kaba dei ka sngi kha u Myntri Rangbahduh ka ri India u Narendra Modi kaba ïa tyngkhuh ruh bad ka sngi kha jong u Mahatma Gandhi, ka shnong Kongthong ka la pynlong ïa kane ka prokram hapoh ka jingïalam jong u Sordar ka Raid Kongthong u Bah Teibor Lynrah ryngkat ka jingïadonlang jong u MP ka Rajya Sabha u Prof. Rakesh Sinha uba la long kum u Kongsan.
Ha kane sngi la ïashim bynta da baroh ki nong shong shnong jong ka shnong Kongthong ba khynthup naduh ki heprit, ki longkmie ki longkpa.Ha ka jingïalang kaba la pynïaid da u Secretary jong ka Raid Kongthong u Bah Stogent Lynrah, la ai jingkren ruh da u Bah Michael Kharsyntiew uwei na ki nongïalam jong ka BJP Meghalaya State Unit bad uba la noh synñiang T.1.21 lak sha ka shnong Kongthong na ka bynta ban pynitynnad bad ban kyntiew ïa ka roi ka par bad ïa ki kam jngohkai pyrthei ha ka Kongthong.
U Prof Rakesh Sinha haba kren kum u Kongsan u la kular ban nong synñiang T. 50 lak na ka bynta ban tei ïa ka ing skul ha ka shnong Kongthong bad u la ai sngewbha ruh ki Copper Momento kiba don ïa ka dur jong u Narendra Modi sha ki 75tylli ki longïing.
Shuh shuh u la kular ba un sa plie noh ha ka 26 tarik mynta u bnai ïa ka khyrdop pdiang sngewbha ïa ki nongjngohkai pyrthei ha ka shnong Kongthong bad ha katei ka sngi, yn sa buh ruh ïa u mawnongrim ban shna noh ïa ka surok kaba pynïasoh naduh ka shnong Kongthong shaduh ka shnong Sder.
U Bah Rothell Khongsit uba long u nongïalam jong ka shnong uba ju don bynta na ka por sha ka por ban wanrah ïa ka roi ka par ha ka shnong Kongthong bad ha ka thaiñ Khat-arshnong baroh kawei u la ai khublei ïa u Prof. Sinha bad ia u Bah Michael Kharsyntiew kiba la kloi phaikhmat lem na ka bynta ban kyntiew ïa ka roi ka par jong kane ka shnong.

Leave A Reply

Your email address will not be published.