Rakhe ka Seng Kur Wahlang ïa ka Jubili Rupa bad pynlong ïa ka Dorbar Bah

0

Shillong, Risaw: Ka Seng Kur Wahlang kala ïoh ban rakhe ïa ka Jubili Rupa bad ka jingpynlong ïa ka Dorbar Bah jong ka ha ka 4 tarik mynta u bnai ha Community Hall, Mission Compound Shillong ha ka jingïadon ryngkat lang ki para kur kiba najan bad na jngai kumjuh.
Na ka liang ka Seng Kur kala pynsngew ruh ïa ki jingtreikam jong ka ha kiba bun ki mat lyngba ka snem 1997 -2022.Nalor kata kala don ruh ka jingpynkup burom ïa ki laingut ki Rangbah kiba la trei shitom ban pynkhieim biang ïa ka Seng Kur kata kiba kynthup ïa u Rangbah Kornilius Wahlang (bam kwai ha dwar U Blei), Rangbah Dilip Wahlang (bam kwah ha Dwar U Blei) bad u Rangbah Roland Wahlang.
Ha kane ka sngi la ioh ruh ka jingkren lyngkot na I Rangbah Roland Wahlang iba la pynpaw ïa ka jingkmen ban ïohi ïa ki kur kiba kitkhia ban beh sha ka Dorbar Kur bad I la kyntu ruh ba kin dang ïai ïabeh sha ki Dorbar Kur ha ki por bad ki snem ki ban dang wan.
Ka Seng Kur kala pynsngew ruh ïa ka report lyngkot shaphang ka histori jong ka seng Kur na I General Secretary Rangbah R.Willie Wahlang bad la ïoh ruh ka jingkren na u President jong ka Seng Kur, u Rangbah River O Wahlang, IFS (Ted) iba la pynpaw ka jingsngew nguh ïa ki longkni bad ki rangbah kiba la kitkhia ban pynwandur ïa ka Seng Kur ha kito ki snem.
Na ka liang u president ula pynpaw ka jingkmen ha kaba ula ïohlad ban don bynta ha kaba pruid dak ïa ka Clan Bill jong ka Khasi Hills Autonomous District Council bad Ila kyntu ïa ki para kur kiba don lad ban buddien khnang ba kane ka Bill kan lah ban longkam. Nalor kata ula ai ruh ïa ki kyntien sneng kyntien kraw ïa ki para kur khamtam ïa ki khynnah samla kynthei bad shynrang ba kin kitkhia ha ka pule ka pule bad ki kam ki jam ki jong ki.
Ha kane ka sngi la ioh ruh ka jingkren na ki nongmihkhmat jong ki Circle/Unit kiba la ïa poi sha kane ka Dorbar, bad la ïoh ruh ka jingrwai ba kyrpang na ka Seng Samla ka Kur kaba la pynshong biej ia ki para Kur kiba wan sha kane ka Dorbar.
Kiwei pat ki kam ba la pyndep ha kane ka sngi ki long ka jingjied ïa ki nongkitkam bathymmai jong ka Seng na ka bynta ka snem 2022-2024.Kine ki kynthup ïa u Rangbah River O.Wahlang kum u president, Rev.Dimosen bad Rangbah Pynshngain Roy Wahlang kum ki vice president, Rangbah R. Willie Wahlang, General Secretary, Rangbah Shaiphar K.Wahlang bad Rangbah Dilton John Wahlang, Joint Secretary, Kong Meristella Treasurer, Rangbah Banrikupar Wahlang Finance Secretary Asstt Organising Secy, Kong Mary N.Wahlang Social & Cultural Secy, Kong Darity Wahlang Asstt, Kong Sara Wahlang Education Secretary, Rangbah HB Wahlang bad Rangbah Choland Wahlang kum ki Adivser bad kong Margareth Wahlang kum I Auditor.
Nalor kata la jied ruh ïa u Danial Wahlang kum u president Seng Samla, Synsharlang Wahlang Secretary nalor ki san ngut ki nongmihkhmat sha ka Executive Committee kaba kynthup ia u Chairman bad Secretary na man ki Circle/Unit.
Kum ka Seng Kur kaba don ïa ka jingkitkhlieh na ka bynta ki para ki pyrsa samla kiba long ka lawei jong ka Kur bad ka jaidbynriew ka khot bad pynshlur ïa ki samla ba kin kiar hotkit hordang na ki jingsniew kiba harukom, hynrei ba kin ïabeh shaphrang ban long ki nongjop ha ka pule puthi bad kiwei kiwei ki lad ki lynti ban pynkhraw ïa lade, ia ka Kur bad ïa ka jaidbynreiw hi baroh kawei.
Shuh shuh ha katei ka sngi kala don ruh ka jingai khusnam sha kito kiba wan shakhmat ha ki jingpule bad ki jingïalehkai sports bapher bapher.

Leave A Reply

Your email address will not be published.