Nang ïoh jingkyrshan ka GSMC na ki kynhun nabar jylla ha ka jingdawa Garo Land
Kan pynïoh mynsiem ïa ka HSPDP: K.P.Pangniang

Nongstoiñ, Risaw, 09: Ka jingïoh jingkyrshan jong ka kynhun na ri lum Garo ka Garoland State Movement Committee (GSMC) na ki khatar tylli ki kynhun na shabar ka jylla ka Ladakh Bundelkhan, Vidanbha Purbanchal, Harit Pradesh Gurkhaland, Bodoland, Tripraland, Dimasa Karbi Mithila,Vidhya Pradesh, ki ban sa ïasoh lang ha kawei ka kynhun ka National Federation for New State (NFNS) kaba la ïalam da u Munish Tamang kum u president, ka la ai mynsiem bad nang pynshkem shuh shuh ïa kawei ka mat treikam ba u (L) bah Hopingstone Lyngdoh u la buh, kum kawei na ki mat trei kam kaba hakhmat eh jong ka Hill Sate People Democratic Party naduh ba la seng ïa ka, ong u bah K.P.Pangñiang MLA barim ka Rambrai Jyrngam Constituency.
U bah Pangñiang u la ong ruh ba wat la u nongseng jong ka party um don shuh, hynrei ki mat treikam kiba u la iehnoh shadien ki dei ki nongrim kiba skhem kiba ka party kam lah ban klet bad ban shu sngap. Nalor kata u la ong ba ha u snem ba la dep u la ïoh lad ban ïakynduh ïa u nongïalam ka Garo National Council, kawei na ki seng saiñ pyrthei kaba ju ïatrei lang bad ka HSPDP naduh mynshuwa, ha kaba utei u nongïalam ka GNC ryngkat ki dkhot ki la pynpaw ba ki kwah eh ban ïatreilang bad ka HSPDP, namar ka GNC ruh naduh ba la seng ka la buh ïa kawei ka mat treikam kaba hakhmat eh ba ka Garo State ka dei kaba don kam ban pynurlong.
Nalor kata u bah Pangñiang u la ong ruh ba ha katei ka jingïakynduh ki la ïatai sani bha bad ki la ïakut ba ka jingdawa ïa ka Khasi Jaiñtia Sate da ka HSPDP bad ka jingdawa Garo Sate da ka GNC, kin long ki mat ba baroh ar tylli ki party kin ïatreilang da ka jingïasngewthuh jingmut bad da ka jingïamynjur lang, ha kaba pynbeit ïa ki pud ki sam, katkum ka jingkwah jong ki paitbah nongshong shnong, ban ïatrei lang ryngkat ryngkat ha ka ban bishar bniah katkum u pud u sam uba la don naduh mynshuwa hapdeng ka West Khasi Hills bad ka East Garo Hills District.
U bah Pangñiang u la ong ba ha kane ka jylla ki don da ki phew tylli ki seng saiñ pyrthei kiba ïakhih khohreh man ka por bad wat ki party riewlum ruh ki don bun tylli, hynrei kim shym pat la kynmaw ba ka Khasi Jaiñtia State ka dei ka lynti bah ban weng ïa ka jingeh jong ka jylla, khmatam eh ha ka ïoh kam ïoh jam jong ki samla bad kiwei kiwei.
Ha kaba ïadei bad ki jingkynthoh jong kiba bun ba ka HSPDP ka dei ka party kaba la rim palat bad kam lah ban ïalam ïa ki paitbah ka jylla, u la ong ba ka jingkynthoh jong ki briew kam lei lei, namar kito kiba kynthoh ki dei ki briew ki bym sngewthuh ïa ki nongrim treikam jong ka party bad ki dei ki bym kwah ba ka jaitbynriew kan neh kan sah pateng la pateng.