Rakhe ka Raj Bhavan Shillong ïa ka sngi ïoh jylla jong ka West Bengal

0

Shillong, Jylliew 21 : Kum shibynta bad ka “Ek Bharat Shreshtha Bharat” kaba dei kaba la sdang da ka Sorkar Pdeng, kaba la thmu ban kyntiew ïa ka jingïasyllok bad ban pynbha ïa ka jingïadei ba sngewthuh hapdeng ki jylla bapher bapher, ki UTs, ka Raj Bhavan, Shillong ka la rakhe ïa ka Foundation Day ne ka sngi ïoh jylla ka West Bengal ha ka sngi Palei ha Raj Bhavan, Shillong ha kaba u Lat ka jylla u Phagu Chauhan u la long u kongsan.
U Harish Chandra Chaudhary, IFS, Principal Secretary jong u Lat ka jylla ha ka jingkren pdiang sngewbha u la ai ka jingïathuh khana kaba lyngkot halor ka histori jong ka jylla West Bengal ha kaba u la pynpaw ruh ïa ka jingkhlaiñ bad ki jingjop jong ki.
Ki khubor na u Lat ka jylla West Bengal, u C.V Ananda Bose la pyni ha kane ka sngi. La pyni ruh ïa ka riti dustur jong ka West Bengal ha kane ka jingrakhe. Ha kane ka jingrakhe la don ki cultural programme ba la pynlong da ka North East Zone Cultural Centre (NEZCC), Ministry of Culture, ka Sorkar Pdeng bad ka Eastern Zonal Cultural Centre (EZCC), Ministry of Culture, ka Sorkar Pdeng.
Ka la don ruh ka jingpyni ïa ka traditional dance ba la khot ka “Chhau” da ka kynhun jong ka West Bengal bad ki artist na Purulia, West Bengal ba la bei pisa da ka East Zone Cultural Centre. Ka jingthaw ïa ki kam u Rabindranath Tagore kaba la tip kyrteng da ka “Meghamallar,” “From the Depth of Darkness,” bad ka “Chandalika,” ka la banjur halor ki jingnoh synniang ka West Bengal sha ka jingriew spah ka riti dustur bad ki jinghiar pateng ha kaba la pyni da ki artist na Geetanjali Dance Academy, Shillong.
Kum ka dak ka jingïaroh, u Lat ka jylla u la ai da ki memento sha ki artist kiba la ïashim bynta.
Ha kane ka programme la shim bynta lang da ki heh ophisar jong ka jylla bad jong ka sorkar pdeng, ki shipai bad ki paramilitary force, ki nonghikai bad ki khynnah pule na ki University bad ki skul bad kumjuh ki nongshong shnong ka jylla West Bengal kiba sah mynta ha Meghalaya.

Leave A Reply

Your email address will not be published.