Rakhe ka Mawpait-Nongthymmai IVCS (MNIVCS) ïa ka jingdap lai snem jong ka jingïaid lynti

Mawkyrwat, Nohprah 03: Ka Mawpait-Nongthymmai IVCS (MNIVCS) ha ka 28 tarik u ‘Naiwieng, 2022 ka la ïoh ban rakhe ïa ka jingdap lai snem (2019-2022) ka jong ka, ha Nongthymmai-Raidewsaw.
Ha kane ka sngi, ka la don ka prokram lehkmen da ki jingïalehkai ïa kop dih um, ïakop tan tyllai, ïakop shad bad drama lyngkot ha kaba baroh ki PG ki la ïoh ban ïashimbynta.
Ha kane ka sngi ha shwa ban sdang ka prokram lehkmen ka la don ka Special General Meeting ha ka jingïadon ryngkat lang jong u Senior Co-operative Officer, bah Y. Lyngdoh na ka ophis SRCS Mawkyrwat, ka MNIVCS ka la pdiang sa ïa ka shnong Mawlyngroh kum kawei na ki shnong kaba dang shu wan pynïasnoh shen bad ka.
Kumba long mynta ka Mawpait-Nongthymmai IVCS ka dei ka IVCS kaba kynthup ïa ka shnong Mawpait-Tlongpleng, Nongthymmai-Raidewsaw, Domshken, Domshken Rum bad Mawlyngroh.
La pynïaid ïa kane ka prokram da u bah R.L. Kharpran uba long u Vice Chairman ka MNIVCS, bud ka jingkren pynshai shaphang ka jingtreikam ka IVCS na u Secretary, bah Donboklang Kharlyngdoh bad ka jingkren ai mynsiem bad kyrkhu kyrdoh na kawei ka longkmie jong ka thain ka kong Victorealness Syiemlieh.
U bah Y. Lyngdoh haba ai jingkren u la ïaroh ïa ka MNIVCS ba ka la ïaid kham shaphrang ha ki jingtreikam jong ka, u la pynkynmaw ba mynshwa, por ba ka sdang ka don tang kumba 43 ngut bad mynta ki la poi sha ka 200 tam. U la ai mynsiem bad kyntu ba ïa ki ba kin nangtrei shitom khnang ba poi sha ki kyrdan ba kham ha khmat.
U bah Donboklang Kharlyngdoh u la ong ba ka jingdon ka MNIVCS ka la pynsuk shibun ïa ki nongshong shnong, lai snem mynshwa ki leit plie ‘saving account’ ne leit shim ram shaduh sha Ranikor ne Mawkyrwat bad da ki taïew shimpor bad ki bnai ba kin ïoh, hynrei, mynta pat wan plie mynstep tang shiphang la ïoh bad passbook bad loan.
Ka kong Victorealness Syiemlieh haba ai jingkren ka la ong ba ka sngewtynnad eh ban tip ba ka MNIVCS ka rakhe ïa ka jingdap 3 snem u mawmer ha ka lynti ïaid ka jong ka, bad ka ïoh ruh ïa ki nongïalam kiba shemphang da kaba kin long kiba ïatrei na bynta ki kam ka imlang ka sahlang (Society), ka la ong. Ka la pyrto ruh ba ka jingïatreilang bad ka jingïashaniah hapoh ka MC, da kaba ki ïadon, watla u Secretary u sah kham jngai na ka shnong.
Kum ka longkmie ka la ïoh ruh ban ai jinghikai shaphang ka jingngop jong ki briew ha ki tyngka pliah, khamtam ha ka por election, ka la ong ba kum kawei na ki longkmie hapoh ka thaiñ, ka don ka mynsiem ban ïatreilang bad ki paidbah, hynrei da ka jingieit ym da ka bor jong ka pisa, ka la ong. Ha kajuh ka por ka la kyrkhu kyrdoh ruh ïa ka MNIVCS ba kan nangkiew nangroi nangne shakhmat.
Haba phai ha ki jingïalehkai, ki nongjop ha ka jingïakhun ïakop-tan-tylli ki long ka Kyrshanlang PG kum ka lahduh bad ka Nangroi Bon PG kum kynhun ba wan ba-ar. Ha ka ïakop-dih-um ka Ïaipyrshang PG ka la long ka lahduh bad ka La-I-Bor Barit PG kum kaba ba-ar.