Kyrmen skhem ki nongkyrshan ka Congress na Rambrai ban jop pyrshah ïa u Bah Kimfa Marbaniang
Nongstoiñ, Nohprah 3: Ka samoi ban jied ïa ki nongmihkhmat sha ka Ïing Dorbar Thaw Aiñ ka jylla, ka sah satang katto katne bnai bad la jan baroh ki seng saiñ pyrthei, ki la ïa pynkhreh bha ïa ki kyrtong ki ban ïakhun ha katei ka election. Ki don ruh ki seng saiñ pyrthei ki ba la don lypa ïa ki kyrtong.
Ha ki lai tylli ki Constituency kiba hap ha West Khasi, ka Nongstoiñ Assembly Constituency bad ka Mawshynrut ki la don lypa ïa ki sitting MLA kiba dei na ka NPP bad na ka Congress ha Nongstoiñ pat la don u sitting MDC u ban ïakhun kum u MLA.
Watla ka Congress Rambrai kam pat pynbna paidbah paidlang ïa u kyrtong ba ka la dep jied, hynrei u bah Bormanding Nonglang District President jong ka West Khasi Hills District Congress Committee haba ïakren bad u nongthoh khubor, u la ong ba ka Congress ka la don lypa ïa u kyrtong ha katei Constituency bad ka jingpynkhreh ruh ka la nang ïaid shait shait.
Haba kylli pat ha kaba ïadei bad ka jinglong jingman jong ka saiñ pyrthei ha ka Rambrai Jyrngam Constituency, u bah Nonglang u la ong ba ki nongmihkhmat jong katei ka Constituency ki la shet kylla ym tang ïa ka party, hynrei ki la shet kylla ruh ïa ki nongkyrshan kiba la pynjop don burom ïa ki.
U la ong ba ba naduh ba u bah Kimfa S. Marbañiang u la jop ïa ka Election MLA ha u snem 2018, ka party ka don ka jingkyrmen ba ha u snem 2023 ruh un dang jop. Hynrei khlem poi pyrkhat ei ei ba u la shah ialam bakla, tangba wat la katta ruh ki nongkyrshan jong ka Congress kin ym kylla da lei lei hynrei kin ïaineh beit kumba ki long.
U bah Nonglang u la ong ruh ba wat la ka Congress kam don shuh ki MLA barim kiba la kham tbit bad kham shem phang ha ka rukom trei kam. Hynrei, ka don ka jingkyrmen ba ki kyrtong kiba thymmai kin jop bad kin long ruh kiba kham shem phang, namar baroh ki kyrtong kiba thymmai ki dei kiba la bit la biang ha ka kyrdan pule.
U la kubur ruh ba ki la don ki nongïalam na ki shnong bapher bapher kiba la mih noh na ka party bad kiba la leit rung noh sha kiwei pat ki party. Ym lah ban len ba ka jingmih noh jong ki na ka party, kan don hi ka jingktah na ka bynta ka Congress ha ka election 2023. Watla katta ruh u la ong ba ka party kam don jingduh jingkyrmen bad ka pyrshang katba lah ban trei shitom na ka bynta ban pynjop biang ha ka election ban wan.