Nongstoiñ, Naitung, 26: Ka Jawahar Navodaya Vidyalaya Nongstoiñ, kum shi bynta ban kyntiew bad puson bniah ïa ka pule puthi hapdeng ki khynnah ym ban shu pule lyndet, ban wanrah ruh ïa ka sap kaba kham kyrpang kaba don ha ki khynnah pule, ban don ka mynsiem sngew sarong ïa la ka Ri India, ka la rakhe ïa ka National Education Policy mynta ka sngi balang ha katei ka skul.
La ong ba ka sorkar lyngba katei ka NeP, ka thmu ban wanrah ïa ka jingnang jingtip kyllum naduh ki kyrdan pre skul haduh ki kyrdan secondary bad haduh 100% ka jingwan rung skul ki khynnah pule haduh u snem 2030.
Ïa kitei ki kyntien la pynpaw da u Brajesh Singh Principal ka Jawahar Navodaya Vidyalaya Nongstoiñ bad u Umesh Kumar Vice Principal ka Jawahar Navodaya Vidyalaya Nongstoiñ, ha ka jingïakren bad ki nongthoh khubor mynta ka sngi ha ophis trei kam jong katei ka Shlem.
U la ong ba ka thong jong ka NEC ka long ban kyntiew ïa ka puson bniah hapdeng ki khynnah, ym ban shu pule lyndey lyndet hyntei ban kyntiew ïa ka jingnang jingtip ha kaba ïadei ruh bad ka jingstad saïan. Ban wanrah ïa ka sap kaba kham kyrpang kaba don ha ki khynnah pule. Ban bsiap ha ka jingmut jingpyrkhat ki khynnah ban don ka mynsiem sngew sarong ïa la ka ri India bad ban kyntiew ïa ka jingnang jingtip.
U la ong ruh ba ki mat ba donkam ha ka NEP 2020 ka long ban wanrah ïa ka jingnang jingtip kyllum naduh ki kyrdan pre skul haduh ki kyrdan secondary bad haduh 100% ka jingwan rung skul ki khynnah pule haduh u snem 2030.
Ki kyndon pynïaid skul kiba la pynithuh thymmai ki 5+3+3+4 ryngkat 12 snem ka jingshong skul bad 3 snem ka pre skul. Ban kyntiew ïa ka jingpyndonkam kaba salonsar ïa ki kor ki bor Saïan bad teknoloji.
U la ong ruh ba ki khynnah skul ki donkam ia ki rukom pule katkum ka jingiaid jong ka por khnang ba kan myntoi hi ia ki.
