Thaiñthynroh, ‘Nailar 22: Ka Lamlynti Village Organisation, Thaiñthynroh kaba kdup ïa ki 15 tylli ki Self Help Groups (SHGs) hapoh jong ka, ka la rakhe ïa ka jingdap shi snem jong ka ha ka 22 tarik u ‘Nailar,2022.
La pynshngaiñ ïa ka jingrakhe da ka jingdon ryngkat u bah Eugeneson Lyngdoh, MLA ka thaiñ, bah Lamphrang Blah, MDC ka thaiñ uba long ruh u Chairman ka KHADC, u bah Staising Kharbteng uwei na ki ‘riew rangbah ka thaiñ, bah Banraplang Kharbteng, Rangbah Shnong bad ki nongshong shnong.
La pynshit rhem ïa ka jingrakhe da ka jingïashimbynta ki longkmie jong ki Self Help Groups da ki skit, ki jingshad, ïakob riam bad kiwei kiwei ki jingpynbyrngia.
Na ka liang ki nongkren kiba kynthup ïa kitei ki ‘riew rangbah ki la pynpaw ba ka jingdon ki Self Help Groups bad ka Village Organisation kum ka kmie ka long ka jingmyntoi ïa ki longkmie ban kyntiew ïa ka kamai kajih jong ki, da kaba kyntu ruh ïa ki ba kin don ka jingïatreilang ha baroh ki liang.
Ki nongïalam ka V.O. ba kynthup ïa i kong Ribhalang Wahlang, President bad i kong Bandaris Sawkmie ki la batai ïa ka jingsdang treikam ka seng bad ïa ka thong jong ki.
La pynïaid ïa ka jingïalang da u bah Banjop Kharryngki, Secretary ka Shnong Thaiñthynroh.