Shillong, Iaiong 03: Ka seng Hynniewtrep Integrated Territorial Organisation (HITO) mynta ka Lah Sngi U Blei, kala rakhe ïaka lyngkhuh dap ar snem da kaba la pyllait paidbah ïaka kali kit metiap kum shi bynta ban synniang ïaka imlang sahlang.
Ka Nongthoh khubor ba pawkhmat ka jylla ka Kong Evanjoplin Dkhar kum ka kongsan, kala aiti ïa katei ka kali kit metiap sha ki nongïalam ka HITO na ka bynta ban ïoh pyndonkam ha ka ban ai jingshakri ïa u paidbah.
Ka Kong Evanjoplin ka la ai khublei ïaka seng HITO halor ka jingkynjoh ar snem ka jongka ha ka ban shakri ïa ka imlang sahlang bad ka la kitbok kitrwiang ïa kane ka seng ba kan nang bteng ban ai ïa ka jingshakri kaba bha ïa ka jylla.
Kala kyrmen skhem ruh ba da ka jingdon katei ka kali khamtam kan ïarap ïa ki longïing kiba duna ka ïoh ka kot ba kin ïoh ban pyndonkam ha ka ban kit ïa la ki baieid bathoiñ kiba la khlad noh sha ki shnong ki thaw jongki.
U President ka HITO u Bah Donbok Dkhar ula ong, ka seng kam shym la pynlong ïa ka jingrakhe mynta u snem ka dei namar ba uwei u dkhot jong ka seng u don hapdeng ka jingshah sumar naka jingshah thombor, kumta ka seng kan sa pynlong ïa ka jingrakhe ha u bnai ban wan ïa ka jingdap ar snem jong ka seng.
Ha katei ka jingrakhe kaba la pynlong ha Shillong Press Club, la ïadonlang u General Secretary ka HITO u Bah Wanbun Dkhar bad ki nongïalam ka HITO.
