Rai u Bah Teibor Pathaw ban ïakhun ïa ka eleskhon MDC, pan jingkyrshan na ki paidbah

Shillong, K’Lyngkot 18 : U MDC ka Mawlai, u Bah Teiborlang Pathaw ha ka sngi Palei u la ong ba un ïakhun biang ïa ka elekshon MDC ka ban sa long shen bad un hun beit ïa ka rai ba ki paidbah kin ai, la ki dang ibit lane kim ibit shuh ïa u ba un shakri ïa ka shnong Mawlai.
Haba kren ïa kane ha ka jingïalang ha Mawtawar, u Bah Teibor u la ong, “Lada ki paidbah ki dang ibit ïanga ban shakri ïa ka Mawlai nga kloi ban shim ïa kane ka lyngkor bad lada ki paidbah kim ibit shuh ba ngan don ha ka shuki MDC, nga kloi ban shong noh shwa shipor na ka Jylli saiñpyrthei.”
U Bah Teibor ha kajuh ka por u la pynpaw ka jingkyrmen kaba skhem ba na ki kam ba u la leh na ka bynta ka shnong Mawlai, ki paidbah kin sa ai ka lad ïa u ba un nang trei shuh shuh ha ka kyrdan kaba kham halor.
Lah ban kdew hangne ba u Bah Teibor uba dei ruh u Executive Member ka KHADC u la ïakhun ha kane ka elekshon MLA kaba dang shu lah shen ha u snem ba la dep na Mawlai tangba u la wan ha ka kyrdan kaba ar hadien ba u kyrtong ka VPP Bah Brightstar Marbaniang u la shah jied kum u MLA ba thymmai.