Shillong, K ’Lyngkot : Ka jingpynkiew jong ka Meghalaya Transport Corporation (MTC) ïa ka bai bos skul na ka bynta ki khynnah skul ba pule ha Kendra Vidyalaya kaba don ha 7 mer, Upper Shillong ka la ktah ïa ki kmie ki kpa, namar la kynnoh ba manla u snem la pynkiew da ki hajar tyngka ka bai leit bai wan ka bym ïahap shuh ïa ki longïing kiba ba phah bun ngut ha kajuh ka skul.
Namar kane ka jingkiew palat pud ka bai bos skul na ka liang katto katne ki kmie ki kpa jong ki khynnah skul ha ka sngi Palei ki la leit ban ïakynduh markhmat ïa u Director ka MTC, ban sngew halor kane ka jingeh ba ki kynduh.
“Hynrei na ka liang u Director u la ong ba ym don satia kiba ujor ïa ka dor jong ka bai bos la buh da ka board. La ong ruh ba kawei pat ka daw kadei namar ka jingrem palat ka umphniang kali,” ong ka Kong Sony Kharjana kaba ïalam ïa katei ka kynhun.
Kane ka longkmie ka la ïathuh ruh ba ka jingkiew palat ka bai bos ka la ktah bha ïa ki kmie ki kpa namar tang ha u snem 2022 ka bai bos ka dei 7500 tyngka bad ha u snem ba la dep ka la kiew sha ka 10,500 tyngka. Hynrei mynta u snem pat ka la kiew syndon sha ka 13,750 tyngka shisnem iwei i khynnah skul.
Ka la ong ba kane ka jingpynkiew ka la long kumba lute na ki paidbah namar ka la ktah bha ïa ki longïing kiba phah bun ngut ki khun ha kajuh ka skul.
Na ka liang ki longkmie kiba la ïakynduh ïa u Director ka MTC hynne ka sngi ki la kyntu ïa kiwei pat ki kmie ki kpa ba kin poi sha ka jingïalang ka ban sa long ha ka 25 tarik mynta u bnai ha Madan Umlyngka ban ïakren halor kane ka kam.
