Hakhmat u Amit Shah pynsngew ka BJP Meghalaya ïa ki mat jingdawa ka Jylla

Shillong, K’lyngkot, 18: Ka BJP Meghalaya State Unit hapoh ka jingïalam jong u State President u Rikman Momin bad u Myntri ka Sorkar Jylla u Bah Alexander L. Hek ki la leit ban ïakynduh ïa u Myntri ka tnat Kam Pohing ka Sorkar Pdeng u Amit Shah ha Shillong ha ka janmiet sngi Balang
Ki nongïalam ka party ki la ïohlad ban ïakren bad ban pynsngew hakhmat u Amit Shah halor ki mat jingdawa jong ka jylla kum ka jingpynrung ïa ka ktien Khasi bad Garo ha ka Khyrnit Baphra, ka Inner Line Permit (ILP) bad ka jingplie ïa ka lynti ïaid sha ka iew ïadie ïathied jong ka thaiñ Shatei Lammihngi lynga ka jylla Meghalaya ïa kaba u Amit Shah ula sngap thuh bad u la kohnguh ba un bishar bniah halor kine ki mat.
U Amit Shah u la khot sngewbha ruh ïa ki nongïalam Niam jong ka jylla sha nongbah Delhi hapoh ka jingïalam jong u State President bad u Bah A L Hek ban ïakren halor ki jingdonkam kiba ïadei bad ka FCRA bad ïa ka jingai jaka ha nongbah Delhi sha ka KJP Synod.