Pynksan ka Sorkar MDA ïa ka jingthungkam Adviser, Chairman, Co-Chairman, Dy. Chairman

By Mawphor News Desk On Jan 19, 2024

Shillong, K’lyngkot, 19: Ka Dr. Ampareen Lyngdoh kaba long ka Myntri bad ka Nongaiktien jong ka Sorkar Meghalaya Democratic Alliance (MDA) ha ka sngi Palei ka la pynksan halor ka jingthungkam Adviser, Chairman, Co. Chairman, Dy. Chairman ïa ki dkhot jong ki seng saiñpyrthei ba kynthup ruh ïa ki MLA ba la rem elekshon.
“Ka long kaba bakla ban pyrkhat ba ka jingthungkam ka dei tang ka jingpynhun jong ka sorkar ïa ki seng saiñpyrthei kiba ïatreilang hapoh ka Sorkar,” la ong ka Dr. Ampareen ha ka jingïakren bad ki lad pathai khubor.
“Ngi don ïa ka Sorkar kaba lah ban shim jingmut na ki riewshemphang na ki riewshimet kiba dei na ki kynhun bapher bapher halor kiba bun ki kam bad kane ka dei kaba la leh naduh mynshwa. Ngam lah ban sngewthuh kumno kiwei pat ki sorkar ba la leit noh lane ha ki snem ban sa wan yn lah ban ïaid lait na kane,” ka la ong.
Kane ka jingkynthoh jong ka Dr. Ampareen ka long halor ka jingdawa jong ka Voice of the People Party (VPP) ban weng lut ïa baroh ki jingthungkam jong ka Sorkar ïa ki dkhot jong ki seng saiñpyrthei namarba ka shu long tang ka jingpynsyrwa kai ïa ka pisa jong u paidbah.
Haba kyntait mardor ïa kane ka jingkynnoh jong ka VPP, ka Dr. Ampareen ka la ong, “ka dei ka jingleh kaba la slem namarba ngi la ïohi ba ngi lah ban pan jingmut na ki riewshimet ha kiba bun ki kam jong ka Sorkar, la ka long ha ka pule puthi, ka koit ka khiah, ka surok, ka PHE lane ha kino kino ki tnat treikam jong ka Sorkar, la ka long ruh ha ka sports, ha ka Arts and Culture, ka sorkar ka donkam ïa kine ki tnat ban thaw namarba ki noh synniang sha ka jingïaid shaphrang ka jylla bad ki ai jingmut ïa ka Sorkar na ka bynta ka jingmyntoi jong ki paidbah,” ka la ong
“Kam don eiei ba kaei kaba kane ka Sorkar ka leh mynta ka shu bud beit ïa kaba la don lypa bad nga ngeit ba ka Sorkar haba ka leh ïa kane, ka la ïoh jingtip bha bad ka tip ïa kaei ba ka leh bad nga thikna ba kine ki jingaikam sha ki paidbah jong ka jylla Meghalaya ka don tang kawei ka thong ha ka jingmut bad kata ka dei ka synshar ka khadar kaba bha bad kaba kyntiew ïa ka jylla ha ka lynti kaba dei,” la bynrap ka Dr. Ampareen.
Kane ka Myntri Sorkar ka la ong tang ka por hi kan sa batai la ki sorkar ki ban sa wan hadien habud kin lah neem ban kiar na kine ki jingthungkam.
Ka la ong ruh ba u Myntri Rangbah bad ka kynhun Myntri ki la shim ïa ka rai kaba dei ban pyrkhing bad ban pynthikna ba kan ym don kano kano ka jingpynlut phut ïa ki kam bym larkam haba phah ïa kano kano ka kam. “Hynrei ban ong ba ka Sorkar MDA 2.0 ka pynkylla khongpong ïa kaba la leh ka long kaba bakla bad khlempep ki sorkar ki ban sa wan kin ym lah lait satia na kane,” ka la bynrap.