Shillong, K’lyngkot, 18: Ka Myntri jong ka Sorkar Jylla ka Dr. Ampareen Lyngdoh ha ka sngi Palei ka la kyntu ïa ka Voice of the People Party (VPP) ban ïakynduh markhmat ïa u Myntri Rangbah ka Jylla u Conrad Kongkal Sang ban pan jingpynshai shuh shuh ha kaba ïadei bad ka mat jong ka Lokayukta ha ka jaka ban shim da ka lynti ka jingïakhih.
Ha ka jingïakren bad ki lad pathai khubor ka Dr. Ampareen ka la ong, “nga kyrpad ïa ka VPP, ban sngewthuh ïa ka jingpynshai ba la ai paidbah da ma ngi ha kine ki khyndiat sngi halor ka jingwengkam ïa ki dkhot jong ka Lokayukta. Ngi kyrpad ïa ka VPP ba kan pan jingpynshai ruh na u Myntri Rangbah bad na ka tnat ba dei peit lada ka dang donkam shuh shuh ïa ka jingpynshai.”
“Ban shu pynlong ïa ka jingïakhih kam long ka lynti kaba dei ban ong ïa ka Sorkar jong phi ne ban pynpaw sha ka Sorkar ïa ka jingsngew jong phi halor kane ka kam bad nga kyrmen ba ngin ym ïohi ïa kino kino ki jingjia kiba la lah ban mih namar ha kaba kut jong ka sngi ka Sorkar bad kynthup ïa ka Liang Pyrshah ki dei leh da ka jingkitkhlieh,” ka la ong.
Kane ka jingkyrpad jong ka Myntri ka long hadien ba ka VPP ka la rai ban pynlong da ka jingïashong kyllaiñ mynngor hakhmat ka Secretariat naduh ka sngi Thohdieng ha ki kynta long trei ban pynbor ïa ka Sorkar ba kan thungkam biang ïa ki ophisar ba la wengkam na ka ophis Meghalaya Lokayukta.
Ka Dr. Ampareen ka la ong shuh shuh ba kam don kano kano ka jingthmu ba sha lyndei lane ka jingpynkhein ïa kano kano ka kyndon haba weng kam ïa ki lai ngut ki ophisar.
“Ngi la shim rai katkum ka Lokayukta Act, kaba la kdew ba ki dkhot jong ka Lokayukta ki dei ban long ki ophisar kiba dang shakri ïa ka kam hapoh ka kyrdan Under Secretary ne Secretary ha kano kano ka tnat treikam ka Sorkar,” ka la ong.
Ka la pynshai shuh shuh, “ngi sngewthuh ba ka don ka jingïapher na ki kyndon jong ka aiñ. Ha kato ka por namar ka jingdonkam kyrkieh, bad namar ba la donkam ban pyntreikam noh ïa ka Lokayukta Act, ïa kaba la pyntreikam hapoh ka jylla Meghalaya bad ha kato ka por ym don satia ki ophisar kiba kot kyrdan, kiba lah ban shimti ïa kine ki jingkitkhlieh bakongsan kum ki dkhot ka Lokayukta bad ïa kane ka jingbakla la lap bad la wanrah hakhmat jong ka Sorkar, ka Sorkar ka la pynmih ïa ka thup kyrteng ba thymmai shwa ban aiti sha ka Lokayukta khnang ban pynbeit ïa ki jingbakla kiba mih ha kaba sdang jong ka jingpynbna ïa ki dkhot sha ka kynhun bakongsan jong ka Lokayukta.”
“Ka jingkyrpad jong nga ïa ki dkhot jong ka VPP ka long ba kin shaniah ha ka Sorkar kaba la pyntreikam ïa ka hukum katkum ka aiñ bad ka Sorkar kam don bor ban thung ïa ki dkhot jong ka Lokayukta hynrei la pynkupbor tang ban shu phah ïa ka thup kyrteng khnang ban pynbeit ïa ki jingbakla hadien ba la pyntreikam nyngkong eh ïa ka Lokayukta ha kane ka jylla Meghalaya,” ka la bynrap.’
Da kaba kyrpad ïa ki kynhun bapher bapher ba kin kiar na kaba pynlong ïa ki jingïakhih sawdong ka Secretariat, ka Dr. Ampareen ka la ong, ‘ngim kwah ban ïohi ïa kano kano ka jingpyrshah bad ki riewpaidbah ban ïalam da kino kino ki seng saiñpyrthei lane da ki kynhun. Ngi kwah ban khanglad ïa kino kino ki jingkynad bad ngi kwah ban ïohi ba ka VPP kan sngewthuh lem ïa ka jinglong jingman kaba ngi don bad ngi kyrpad ïa ka VPP ba kan shim da kiwei pat ki lad ne ban wan sha ka jingïakren kaba kim pat sngewthuh ha ka jingmut jingpyrkhat jong ki. Ka jingkyrpad jong nga ïa ka VPP kum ka seng saiñpyrthei ka lah ban ïakynduh ïa u Myntri Rangbah, lada ki donkam ïa ka jingpynshai, yn sa batai ïa ki.”
