Khang ka Sorkar ban ïakhih ba wan u Amit Shah bad ki CM ka NE, ngin tur beit, ong ka VPP

Shillong, K’lyngkot 18: Ha ka sngi thohdieng, kata ka 19 tarik u Kyllalyngkot, ka nongbah Shillong ym tang ba kan bunkam ha kaba pdiang ïa u Amit Shah, Myntri kam pohïing ka ri India, hynrei ka nongbah Shillong ka lah ban ïohi ruh ïa ka jingïatyngkhuh hapdeng ki bor sorkat bad ki nongkyrshan ka seng Voice of the People Party (VPP)
Kane ka long hadien ba ka District Magistrate jong ka East Khasi Hills ka la pynmih ïa ka humum mynta ka sngi hadien ba ka la ïohi ba ka Seng VPP kan pynlong ïa ka jingïakhih hakhmat Main Secretariat ban dawa thungkam biang ïa ki lai ngut ki ophisar jong ka Meghalaya Lokayukta kiba la tohkit bad lap ïa ki kam bamsap jong u MLA ka Mahendraganj, u Sanjay Sangma, uba dei u kynum jong u Conrad Sangma, u Myntri Rangbah ka jylla.
Ka hukum na ka ka DM, ka ong ba namar ka 19 tarik kadei ka jingialang jong ka North Eastern Council (NEC) ha Shillong ha kaba u Amit Shah, ki Myntri na ka tnad DoNER, ki Myntri Rangbah na ka thaiñ shatei lammihngi ruh kin wan lang ban ïakren ïa ki polisi treikam bad ki kam pynroi ka thaiñ shatei lammihngi, ka long kaba donkam ban pynneh ïa ka suk ka saiñ ha ka nongbah bad ha ka jylla.
Kumta halor kane ka bynta ka DM ka la pynjari da ka Sectiaon 144 CrPC ha ki bynta kiba hap 20 Meter sawdong jong ka Main Secretariat, Addl Secretariat bad Rah Bhavan bad ka khang ruh ïa ka VPP ban pynlong ïa kane ka jingïakhih.
Hynrei na ka liang ka Seng VPP ka la rai ban ïaid beit shakhmat bad kane ka jingïakhiha. “Ngin ïaid beit shakhmat bad kane ka jingïakhih”, la ong u Dr. Ricky AJ Syngkon, General Secretary ka Party, namar ba ka Seng ka la ai por 24 kynta ïa ka sorkar ban thung biang ïa ki ophisar ka Lokayukta, hynrei ka sorkar kam shym la sngap.
U Dr. Ricky, u la ong ba ki jingaidaw ka sorkar ki long ki bym shongnia, bad ki rukom pynshai na ki briew jong ka sorkar ruh ki long ki bym don nongrim eiei. U la ong ba kum ka Seng naduh ba sdang ka la rai ban ïaleh pyrshah ïa ki kam bamsap. Kane ka jingïakhih kadei shi bynta ban ïaleh pyrshah ïa ki kam bamsap.