Rai kyrshan noh u kyrtong shimet na Nongthymmai ïa u CEM ba mynta

0

Shillong, Rymphang 01: U Kyrtong shimet na Nongthymmai Constituency u Bah Erson Marweiñ u la pynbna ba un kynran dien noh na ka jingïakhun ha ka ilekshon MDC ban wan sha ka Ïingdorbar ka Khasi Hills Autonomous District Council (KHADC).
Lah ban pynkynmaw ba dangshen u Bah Erson u la pynbna ban ïakhun kum u kyrtong shimet na Nongthymmai constituency.
Ha kaba ïadei bad kane haba kren sha ki lad pathai khubor u Bah Erson u la ïathuh ba ka rai ban kynran dien noh na ka jingïakhun MDC ka dei hadien ba ki nongkyrshan jong u, ki la ai jingmut ban kyrshan lang noh ïa u CEM ka KHADC u Bah Pynïaid Sing Syiem u ban ïakhun na Nongthymmai constituency na ka National People’s Party (NPP).
Halor kane u Bah Erson u la ïathuh ba ha ka 29 tarik mynta u bnai, u la lum ka jingïalang bad ki nongkyrshan, kaba la shim ïa kawei ka rai ban ai jingkyrshan noh ïa u Bah Pynïaid Sing Syiem.
“Haba don ki briew kiba thrang shisha ban shakri ïa ki paidbah lyngba ki kam bapher bapher, Nga ruh ngan long uba kloi ba ngan ai noh ka jingkyrshan ïa u Bah Pynïaid Sing Syiem,” pynpaw u Bah Erson.
U Bah Erson u la ong ba kane ka jingkyrshan ia u Bah Pynïaid kam mut ba un rung noh shaka NPP hynrei kadei thik tang ban kyrshan ia u Bah Pynïaid uba la synniang bun bah ki kam la kadei hapoh ka District Council ne ha shnong ha thaw.

Leave A Reply

Your email address will not be published.