Rai ki paidbah ka Salsella bad Chokpot ban kyrshan NPP hadien ba kular theh kam pynroi u CM

0

Tura, Rymphang 13 : U Myntri Rangbah ka Jylla bad National President ka National People’s Party (NPP) Conrad K Sangma, hynne ka sngi nyngkong, ula sdang biang ïa ka kylla kaba –ar jong ka jingleit ïalap elekshon bad pyndonkam da ka helicopter ban rung sha ki constituency ba sha kyndong jong ka Ri-lum Garo.
Hynne ka sngi, u Conrad ula pynlong ïaka jingïalap elekshon ha Narangbari kaba hap hapoh ka 48-Selsella Constituency bad ha Chokpot kaba hap hapoh ka 53-Chokpot Constituency.
U Conrad u dei uba mihkhmat teng ïa ka Selsella Constituency ha u snem 2008 bad u dei ruh u Myntri pla tyngka ba khynnah tam ka Jylla ha katei ka por.
Haba kren ha ka jingïalang, ula ong ba ka Selsella ka dei ka constituency kaba u sngewjan bha bad ula kren halor ka jingïa dei jong u bad ki paidbah, kaba la kham palat ïa ka kam saiñ pyrthei. “Ki paidbah ka Selsella kila hikai ïa nga halor ka kam saiñ pyrthei, nga la ïoh shibun ki jingnang jingtip ha ka kam saiñ pyrthei nangne” ula ong haba bynrap ba u dang ïai bteng ban pynlut kham bun ïa ka por sha ki paidbah bad ki jingeh jong ka Selsella.
Haba kren ïa ka mat ba pynïaid ïa baroh kiba wan ïashimbynta, ula ong “Ka Elekshon ka wan bad ka leit, ki jingeh ki wan bad ki leit hynrei tang kawei kaba ïai neh ka dei ka jingïadei. Ngi baroh la kha ha Ri-lum Garo, Ngi la sah ha Ri-lum Garo bad ngin pynkut ïa ka jingim jong ngi ha Ri-lum Garo, na kata ka daw ngi donkam ban don ka jingïatreilang”.
U Conrad ula pynpaw ruh ba kum u Myntri Rangbah ula pynthikna ba u shim ïa ki jingai jingmut jong baroh ki briew na ki niam bapher bapher, ne ki jaidbynriew. “Nga kular ha phi ba ngam ju ibeiñ ïano ïano ruh ha ka kam ba nga trei. Nga burom ïa baroh bad nga ñiewkor kumjuh ïa baroh” ula ong.
Haba pynpaw ba u Arbinstone Marak u dei u Khun ka Ri-lum Garo bad ba ki paidbah ki dei ban ïatylli ha kaban vote ïa u, ula ong “U dei na Selsella bad u tip ïa ki jingeh jong ka thaiñ bad u dei uba biang eh ban mihkhmat ha kaban pynsngew ïa ka sur jong ki paidbah”.
U Conrad ula ong ruh ba ula jied ïa u Arbinstone Marak ha ka jaka ka MLA namar ba ki paidbah kila tyrwa ïa u bad pynpaw ba kin ai ka jingkyrshan kaba khlaiñ bha.
Haba pynpaw ba ka NPP kala pynkhreh ban thaw biang ïa ka Sorkar ban wan, ula ïasaid ba kam don jingmut ban vote ïa ki kyrtong jong kiwei ki party ki ban nym thaw ïa ka Sorkar. “Ka saiñ hima sima ha Meghalaya kala ïapher bha mynta. Ki paidbah ka Ri-lum Khasi bad Jaintia kila ïatylli ban pynkhlaiñ ïa ka NPP bad ngi sngewskhem ban jop bun duh na baroh” ula ong.
Ha Chokpot, une u Khliehduh ka NPP ula kren sani bha halor ki kam pynroi bapher bapher bala wanrah da ka Sorkar ba ïalam ka NPP ban pynthikna ïa ka jingkiew shaphrang jong ka South Garo Hills, kaba la shah iehbeiñ da ki phew snem haba kyntu ruh ïa ki paidbah ba kin vote ïa u kyrtong ka NPP u Sengchim Sangma.
Ula ong ba ka jinglong jingman ka surok sha Chokpot ka long kaba sniew bha hynrei ka Sorkar ba ïalam da ka NPP kala pynthikna ba ka jingshna ïa kane ka surok ka long kaba kongsan naduh na 9th mile jong ka surok Tura-Dalu haduh ha Chokpot.
Ula ong ruh ba ka Sorkar ba ïalam da ka NPP kala shim ïa ka sienjam ban shna ïa ka Ophis jong ka Block bad ka Civil Sub Division. Ula ong ruh ba ka Sorkar kala dep mang jan T.100 klur ban pyntrei ïa ki kam pynroi bapher bapher ha ka thaiñ Chokpot.

Leave A Reply

Your email address will not be published.