Shillong, Rymphang 13 : U Chairman ka AICC, Media and Publicity, u Pawan Khera u la kynnoh ba u Dr Mukul Sangma u long kum u Brutus uba dung tari nadien ïa ka Congress bad une un sa leh kumjuh ïa ka Mamata Banerjee bad ki nongïalam ka TMC.
“ Ngam da kwah ban kynthoh eh ïa une u briew uba la long mynta u Brutus, ka Mamata ka la dei ban sngewthuh nga mut ïano. Lada kam sngewthuh ruh kan sa sngewthuh ha ki khyndiat bnai ne snem. Namar lada u lah ban leh kumne ïa ngi ( Congress) un leh kumjuh ïa ka ruh” ong u Khera haba kren ha ki lad pathai khubor.
“ Ngi la ïohi ïa ka Team A, Team B, Team C bad Team D baroh ki tip bad ïohi mano ba leh na ka bynta jongno ruh” ong u Khera.
Haba la kylli ïa u Khera u la ong ba u Brutus u dei u Dr Mukul Sangma namar ïa u Brutus la jer kyrteng noh kum u Mukul Sangma bad u la ong ki paidbah ki la tip hi ïa ka khana shaphang u Brutus kaei kaba u la leh. Ka Congress ka la shah ktah jur bha haba u Dr Mukul bad ki 11 ngut ki MLA ka Congress ki la phet jyndat bad pynïasoh sha ka TMC kaba dei mynta ka Liang Pyrshah.
U la ong ruh ba kito kiwei ki MLA ki dei kiba tlot bor namar ha ka por ba hap ban ïakhun tyngeh kiba tlot bor ki phet noh kiba khlaiñ bor ki ïeng ban ïakhun bad phi ïohi mynta kiba bun ki kyrtong jongka Congress kynthei bad shynrang kiba khlaiñ bor bad kine kin sa jop.
U la ong “ Ngi la wan sha Meghalaya namar ngi thikna ban thaw ïa ka sorkar ba thymmai ka ban pyllait ïaka jylla na ka jingbamsap bad lait na ki jingïasylla bad ïateh lok bad kita ki seng arsap”.
Ki paidbah ki kwah ïa ka 5 star Meghalaya kiba dei ki san tylli ki nongrim jongka Congress bad kita ki long ki jingpynkylla thymmai ïa ka Meghalaya namar kine kin jia tang lada wan ka jingkylla. “ Ngi kular ïa phi ba tang hapoh 100 sngi ba ngin synshar ngin wanrah ki jingkylla” ong u Khera.
