Da ki hajar hajar tuid ki nongkyrshan sha ka jingïalang ha Khanduli
Syllad ka lyer NPP ha ka Nartiang Constituency
Jowai, Rymphang 13: Ka lyer jong ka NPP hapoh ka 1-Nartiang Constituency kala syllad jur, kaba la sakhi mynta ka sngi ha ka jingïalang ba la khot pynlong da u kyrtong ka NPP ma Sniawbhalang Dhar ha madan heh jong ka shnong Khanduli, ha kaba da ki hajar hajar ngut ki nongkyrshan ka Party NPP na ki shnong bapher bapher kynthup ïa kiba na khappud kila ïamih paidbah sha kane ka jingïalang.
Kane ka jingmih ki paidbah ka long kum ka dak bad ka jingai jingkyrshan ba pura jong ki ïa u ma Sniawbhalang Dhar ban ïoh biang ïa ka jingjop sa ha kane ka kynti ban long biang sa shisien kum u nongmihkhmat sha ka Dorbar thawaiñ ka jylla na ka bynta kane ka samoi 5 snem ban wan.
‘Kiba bun na ki nongkren ha kane ka jingïalang khamtam naduh ki nongïalam shnong ka Khanduli kila pynsngew ïa ki kam jong u ma Sniawbhalang Dhar kiba la kren kham jam’.
Nalor kiwei de ki nongkren ki kynthup ïa u CEM ka JHADC ma Thombor Shiwat uba la pynsngew ba ha kane ka kynti ki paidbah kin pynjop don burom ïa u ma Sniawbha da kaba pyntam haduh 7 hajar tam ïa ka Vote.
Ula khot ba kane ka kali ba thymmai (NPP) kaba ïalam da u ma Sniawbha kan long shisha ka Party kaba trei na ka bynta ki paidbah ym kum kato ka kali ba rim (Congress). Ula ong haduh mynta ki paidbah ki dang shaniah ha une u nongmihkhmat da kaba pynsngew ba u ma Sniawbha un ïaleh ban pynbeit noh ïa ka jingïakhajia pud hapdeng ka Assam.
Na ka liang u ma Sniawbhalang Dhar ha ka jingkren ula ong kum u Chairman ka District Regional Boundary Committee ula kren shai ynda ula wan biang ha ka jingjop ïa kane ka jingpynbeit pud yn pyndep noh ïa kiba dang sahteng, kata ban pynwan ïa kito ki jaka naduh ka Block I & II shapoh ka jylla Meghalaya.
Kiwei de ki nongkren ha kane ka sngi kila pynsngew ha kaba ïadei bad u pud u sam dei tang ka NPP kaba nud ban ïakren bad ban pynbeit noh ïa u pud u sam hapdeng ki ar jylla Meghalaya-Assam.
Ïa ka jingïalang la pynïaid da u ma Hamkom Khynriam ha kaba ula kam ba ka jingwan ki paidbah sha kane ka jingïalang kala poi sha ka 25 hajar ngut.
Ha kane ka sngi la pynshong shit shuh shuh da ki jingshad na ki khun samla bad ki jingrwai na ki longkmie ka thaiñ, katba ki na ka liang ki paid nongkyrshan kila shim bynta lang ban ïashad ïakmen ha madan.