Katne u paidbah, Maheh shongthait donburom noh ai noh ka jingkyrkhu ïa Bah Samlin : ong u Bah Prestone ha Sohïong
Shillong, Rymphang 13 : Da ki hajar ngut ki nongshong shnong ka Sohïong constituency ki la tuid sha ka jingïalang ïalap elekshon jong u kyrtong ka NPP Sohïong, Bah Samin Malngiang kaba long ha kane ka sngi Nyngkong ha Rangshken.
Ki heh ka NPP kiba la wan ban ïalap elekshon lang na ka bynta utei u kyrtong ha katei ka sngi ki kynthup naduh u National Vice President ka party Bah Prestone Tynsong ba dei ruh u Symbud Myntri Rangbah ka jylla, nangta u President ka NPP Meghalaya Dr. WR Kharlukhi, ki heh ka NPP East Khasi Hills bad ruh na ka NPYF nalor kiwei kiwei.
Na ka liang u National Vice President ka party haba kren ha katei ka jingïalang u la ong ba ka jingbun u paidbah ba poi sha katei ka jingïalang ka la pyntikna lypa ba u Bah Samlin u la jop donburom. Shuh shuh u la ong ruh ba u kyntu ruh ïa u kyrtong ka UDP, Bah HDR Lyngdoh ba un shongthait noh bad ban shu ai noh ka jingkyrkhu ïa u Bah Samlin.
“Ko Maheh, katne phi ïohi u paidbah to seh shongthait donburom noh ka la biang shu ai noh ka jingkyrkhu jongphi sha u Bah Samlin namar u la dep tip lut ka rukom treikam namar u kham tip u nongshah hikai ban ïa u nonghikai ban wanrah ïa ka kam pynroi ha sohiong constituency,” la bynrap biang u Bah Prestone.
Utei u heh ka NPP u la kular ruh ba u Bah Samlin kum u MLA ba thymmai un ïoh biang ban don ha Secretariat.
Na ka liang u kyrtong ka party u la ong ba kumba u jop ha u snem 2018 da ka jingieid kumta ruh un bteng biang ïa ka jingjop da ka jingieid. U Bah Samlin u la ïathuh ruh ba lada kren ïa ki kam pynroi ki la don bun bha ki jingkylla ba u la lah ban trei ha kine ki 5 snem kum u nongmihkhmat la ka long ha ki lynti syngkien, ka umbam umdih, ka koit ka khiah , ka pule ka puthi bad bun kiwei kiwei.
U President ka NPP Meghalaya, Dr. WR Kharlukhi pat u la ïathuh ba kadei ka jingshisha ba ka la don ka jingtyrwa na u Bah HDR ban wan sha ka NPP hynrei ki la jied pat da u ba kham samla, kata u Bah Samlin Malngiang.
Ha shwa kane, la ïoh ruh ïa ka jingkren na bun ki nongïalam kiba donlang bad u Bah HDR Lyngdoh ha ka por ba u dang don ha ka Congress bad ruh na u Chief Adviser ka UDP Sohiong, Bah K Sunn uba la phet noh hadien ba um sngewïahap shuh ïa ka rukom treikam bad ka kynhun kaba thymmai.