Lada phim sngewmon ïa ki ban leit shim jingïarap na u Dasakhiat khang ïa ki, ong u kyrtong ka NPP

Shillong, Rymphang 13: U Kyrtong ka National People’s Party (NPP) na Nongkrem constituency u la kyntait ban kynthoh ïa kiwei pat kiba ïakhun pyrshah ïa u ha ka ilekshon, ha kaba u la ong, “Ngam kwah ban pynjaboh ïa ka shyntur lajong tang na ka daw jong ka politik.”
Haba kren ha ka jingïalang ïalap election ha madan Laitkor, u Bah Lamare u la ong ba baroh 7 ngut ki kyrtong kiba ïakhun pyrshah kim ïakren shuh paramaki, hynrei ki shu kynthoh beit tang ïa u Dasakhiat, “Ngam tip haduh katno kata ka jingieid ïa uta u Dasakhiat,” u la ong shuh shuh.
Halor ka jingkynnoh heh spah bad ba u leit thied ïa ki vote, u la ong ba um don uwei ruh ba u la thied bad rah sha ïing. “Phin thied kumno ïa ka vote kaba dei ka hok jong ki paidbah ba ki leit thep beit ha kyndong marwei,” u la ong.
U Bah Lamare u la ong shuh shuh ba ka rukom kren jong kiwei ki kyrtong shano kan ïalam. “Ngi ïohsngew ïa ka jingïalap jong kiwei ki kyntong haba ki pyndonkam da ki kyntien kiba khuid, tang 5 minit hadien sneng pop pat ïa ki paidbah da kaba ong shim beit wat sngewnguh wat thep, u dep shato haba u ai sngewbha,” u la ong bad bynrap ba kine ki jingsneng kidei kiba ma bha bad shano kan poi ka lawei kiba dang khynnah.
“Lada phim sngewmon ïa ki ban leit shim jingïarap na u Dasakhiat, khang ïa ki ban nym leit ,” u la ong shuh shuh.
Na ka liang u MLA barim ka Umroi, u Bah Ngaitlang Dhar uba dei u kpa jong u Bah Dasakhiat, u la ong ba ha kine ki sngi ïalap election ka don beit tang ka jingbeiñ ïa ka NPP bad ïa kita ki heh spah, ym don shuh da kiwei kiwei ki jingkren.
“Ngam dei uta u heh spah, hynrei ka jingpaw bad ka jingkheiñ ba ngi dei ki heh spah kadei ba ngi heh ka mynsiem da kaba kloi ban ïasnohkti lang bad ban kyrshan lem ïa ki kup shiliang sem shiliang,” u la ong.
U la ong ba ka jingkynnoh bad ki jingkren jong kiwei ki kyrtong kidei tang ki buit ban pyntieng ban pynsmiej ïa ki paidbah ka Nongkrem constituency.