Shillong, Naiwieng 26: Ka sorkar jylla ka la rai ban pynkynriah ïa kiba shongdie madan sha ki jaka ba la buh ha Khyndailad bad ki thaiñ Civil Hospital ha kaba kine kin dei ha ka bynta banyngkong. Kane ka dei ka rai ba la ïashim lang ha ka jingïalang ba la pynïaid da u Symbud Myntri Rangbah ka jylla uba khmih ïa ka tnat Pynroi Sor u Bah Sniawbhalang Dhar ryngkatlang bad u Myntri ka tnat Jngohkai Pyrthei, ka Myntri Agriculture and Farmers’ Welfare, u Myntri ka tnat Animal Husbandry and Veterinary kumjuh ruh ki nongmihkhmat napoh ka tnat Health and Family Welfare, ka tnat ki Kam Pohïing, Urban affairs, Public Works department, bad kiwei pat ki tnat kiba kongsan bad ki riewshemphang.
Ïa kane ka rai la shim hadien ba la mih ka jingbthah jong ka Meghalaya High Court, kaba bthah ïa ka tnat Urban Affairs ban thaw ïa ka committee kaba kynthup ïa ki bor pynïaid bad ban ithuh bad wad ïa ki jaka ban shong kiba die madan bad kiba die ha ki rud surok.
Ha ka jingthoh ba la pynmih da u additional secretary ka tnat urban affairs ha ka sngi baar ka la ong, “la shim ïa ka rai ba ha ka kyrdan kaba nyngkong ne first phase, ïa kiba die madan yn sa pynkynriah sha ki jaka ba la buh ha Khyndai Lad bad ki thaiñ Civil Hospital.”
“Ka tnat ka la khmih lynti ban ithuh ïa ki vending zone bad ban sam ïa kane ka jingpyntip sha ki nongshongdie madan kiba la shah jied bad ithuh bad ïa ki jaka yn sa pyntip khamkloi katba lah. Haba pynbud ïa kane, yn ai por kumba 30 sngi ban pynkynriah hadien ba la pynmih ïa ki syrnot ne certificate, kaba long katkum ka scheme,” la ong ka jingthoh.
“Ka Town Vending Committee (TVC) ka dang don ka jingïakren kaba manla ka por bad ka seng kiba die madan bad ka la shim manla ki sienjam ban pynthikna ba ka jingpyntreikam ïa kane ka jingpynkynriah ïa ki la pynurlong ha ka rukom ba la pynbeit. Ïa ka rukom pyrkhat ne ka approved street vending plan yn sa pynbna sha ki paidbah khamkloi katba lah,” la bynrap.
Ban ïada ïa ki hok jong kiba shongdie madan hapoh sor bad ki kyndon halor ki kam jong ki, ka sorkar pdeng ka la thaw ïa ka Street Vendors (Protection of Livelihood and Regulation of Street Vending) Act, 2014. Kane ka aiñ ka long kaba donkam ïa manla ki jylla ban thaw ïa ki Town Vending Committy, ban ithuh bad ban lum kyrteng ïa kiba die madan harud surok, bad ban buh dak ïa ki jaka ba lah ban shongdie madan bad ki bym lah ban die madan.
Haba ïadei bad kane ka act, la thaw ïa ka Town Vending Committee (TVC) ha u snem 2022. Ïa ka TVC la pynïaid da u CEO ka Shillong Municipal Board (SMB) bad kynthup ruh ïa ki nongmihkhmat na ka ophis Deputy Commissioner, ka tnat pulit, ka tnat Pynroi Sor, ki municipal board, ki Rangbah shnong, ka State Urban Livelihood Mission, bad ka seng kiba shongdie madan. Ka TVC ka la dep ban pynlong kumba 10 tylli ki jingïalang ban ïakren halor kine ki kam ba ïadei bad ki jingdie madan.
Ban kham pynbha shuh shuh ïa ka kam ka jingleit jurip bad ka jingithuh ïa kiba shongdie madan kiba la long kiba bitdor, ka jylla ka la thaw ïa ka Meghalaya Street Vendors (Protection of Livelihood and Regulation of Street Vending) Scheme ha u snem 2023.
Kane ka scheme ka pynbiang ïa ka lad ban ithuh ïa ki jaka ba lah ban shongdie madan ha kata ka rukom ba yn lah ban ithuh noh ïa kine ki jaka bad ba yn sa pynbna hadien. Ha kane ka skhim ka ai ruh ka lad ha kaba yn sam ïa ki Certificates of Vending (CoV) sha kito kiba shongdie madan kiba la ithuh.
Shuh shuh ha kane ka skhim ka la don ruh ka jingbthah bad jingkdew na ka bynta kito kiba shongdie madan kiba la shah jied bad kiba la ithuh bad ki jaka ba la ithuh bad ban lum lang ïa ki kam na ka bynta ban pynkynriah sha ki jaka ba la ithuh ne ki vending zone. La ong ba ki jingjurip la pynlong ha ki 22 tylli ki shnong hapdeng u Nohprah u snem 2023 bad u Kyllalyngkot 2024 kumba la kdew hapoh ka scheme.
Kine ki shnong ki kynthup ïa ki thaiñ Khyndai Lad, Assembly, Barik, Dhankheti, Firebridge, GS Road, Governor, Ïew Mawlong, Laban, Jail Road, Lachumiere, Laitumkhrah Firebrigade, Lumshatsngi, Malki, Motphran, Polo, Qualapatty, Quintton Road, Red Cross, Umsohsun, Wahthapbru, bad Wards Lake.
