Nongpoh, Nohprah 23: Wat la ka kynhun Hindu ba la tip kkum ka Kutumba Surakshya Parishad (KSP) ki la byrngem ban pynlong ïa ka jingïakhih ha Byrnihat, kaba dei halor ka jingbym urlong ka jingdawa ban ïoh lehñiam ha ka krem Mawjymbuiñ ha Mawsynram bad na ka liang ki bor synshar District na Ri Bhoi ki la pynthikna ba ki la peitngor bha bad kin nym ailad ba kin pynlong ïa kata ka jingïakhih ba kane ka ktah ïa ka shongsuk shongsaiñ ki paidbah.
Kum ban pynkynmaw, katei ka kyhun ki shitñiam Hindu ki la thmu ban pynlong da ka jingïakhih, ka dei halor ka nongrim ba ki la dawa na ka sorkar Meghalaya ba ka dei ban ailad ïa ki paid Hindu ban lehñiam hapoh ka Krem Mawjymbuiñ ha Mawsynram ba la mih ruh ki kynrum ki kynram ha kine ki sngi bad namar ka jingbym ulor ka jingdawa ki la byrngem ban ïakhih ne khang lynti ha Byrnihat bad ha ka thaiñ Khanapara.
Haba la ïoh ban ïakren bad u Deputy Commissioner ka Ri Bhoi, u Abhilash Baranwal bad u Superintendent of Police ka Ri Bhoi, u V.S Rathore, ki la ong ba na ka liang ka bor synshar district ki la peitngor bha halor katei ka jingthmu ïakhih katei ka kynhun Hindu ha Byrnihat bad ki la ong ruh ba na ka bynta ka shongsuk shongsaiñ ki paidbah kin nym ailad ba kin pynlong ïa katei ka prokram ïakhih khamtam kane ka aïom ka dei ka aïom lehkmen Christmas bad snem thymmai, ka ban sa ktah pat ïa ka shongsuk shongsaiñ ki paidbah ha kum kane ka aïom lehkmen.
Ki la bynrap ruh da kaba ong, ba ka tnad Pulit ka la dep ruh ba ïa kren bad ki bor Pulit ka Assam ba hap ha ka Kamrup Metro ba kim die ban ailad ïa katei ka kynhun ban pynlong ïa ka jingïakhih bad na ka liang ka ophis u Deputy Commissioner ruh ka la dep ban ïakren bad u Deputy Commissioner ka Kamrup Metro ba kim dei ban shah ban pynlong ïa ka jingïakhih, ba kane ka ktah shisha ïa ka shongsuk shongsaiñ ki paidbah.
Shuh shuh, ki la pynpaw ruh ba ki bor synshar na Ri Bhoi bad na Kamrup Metro kin ïatrei lang ban tehlakam ba kin nym ailad ban pynlong ïa ka jingïakhih, la ka long ha u pud u sam ka Meghalaya ne Assam, namar na ka liang ki bor synshar District ki la peitngor bha bad ki la pynkreh ruh ban pynbiang ïa ki bor pahara khnang ban nym ailad ïa katei ka kynhun kaba thmu ban pynlong ïa ka jingïakhih kaba lah ban ktah ïa ka shongsuk shongsaiñ ki paidbah, ki la bynrap.
