Shillong, Nohprah, 23: Ka Dorbar Shnong Umphyrnai ha ka Lah Sngi u Blei ka la shim da ka rai ban boycott ne ban ym ïashim bynta ban jied ïa ki nongmihkhmat ha ka elekshon MDC 2025 sha ka ïingdorbar Thawaiñ jong ka Khasi Hills Autonomous District Council halor ka nongrim ba ka Executive Committee ba la ïalam da u Bah Pynïaid Sing Syiem kum u Chief Executive Member bad u Bah Pynshngaiñ N Syiem, mynba u dang long kum u Dy Chief Executive Member uba khmih ïa ka tnat Elaka Administration ka leh donbor da kaba pynmih hukum ban ai jingithuh ïa ka shnong thymmai kaba la tip kum ka Mawsaw.
Ka jaka ba la ithuh kum ka shnong ba thymmai ka dei kaba don ha ka dong Dymmiew ha ka shnong Umphyrnai bad ka dei ka jong ka Kur Kharkongor na ka shnong Pohkseh kaba don tang 18 tylli longïing ha kaba ki bor pynïaid shnong ka jong ka shnong Umphyrnai ki la kdew ba napdeng kine ruh kim kyrshan satia ïa ka rai ban pynkha ïa ka shnong bathymmai.
Kum ban shu pyntip hangne, ka Khasi Hills Autonomous District Council ka la pynmih ïa ka hukum ithuh shnong thymmai ïa ka Mawsaw ha ka 13 tarik, Nohprah, 2024 ha ka sngi ba u Bah Pynshngaiñ N, Syiem uba dei u MDC na ka seng Congress u la iehnoh ïa ka kam Dy CEM bad weng ïa ka jingkyrshan ruh na ka Executive Committee ba lam khmat da ka National People’s Party.
Shuh shuh ka Dorbar Shnong ka la shim ruh ïa ka rai ban ym ïashim bynta ha ka elekshon MDC halor ka nongrim ban pyrshah ïa ka jingpyntreikam ïa ka Building By-laws da ka Khasi Hills Autonomous District Council ha kaba kiba shna ïing ki hap ban ïoh ïa ka Building Permission nalor ka jingsiew kaba ktah ïa ki nongshong shnong.
Hadien ba la wai ka Dorbar, ki paidbah nongshong shnong ki la pyni ïa ka dak jong ka jingïatylli da kaba noh synniang da ka pisa khnang ba ka Executive Committee jong ka Dorbar Shnong kan ïoh ban pyndonkam na ka bynta ban ïakhun pyrshah lada ka long da ka lynti jong ka aiñ pyrshah ïa ka hukum thaw shnong da ka Khasi Hills Autonomous District Council.
