Rai ka Dorbar Hima Langrin ban pynduh noh katto katne ki Aiñ barim bad buh da kiba thymmai

Mawkyrwat, Kyllalyngkot 10: Ka Hima Langrin Syiemship hapoh ka jingïalam jong u Acting Syiem, u bah B.H. Syiemïong ha ka 09 tarik u Kyllalyngkot, 2023 ka la ïoh ban pynlong ïa ka Dorbar Hima ba nyngkong hapoh ka phyllaw jong ka Ïing Dorbar Hima ha Shnong Phlangdiloiñ, South West Khasi Hills District.
Kane ka Dorbar Hima kaba la pynlong hynnin ka sngi ka dei ka Dorbar ba nyngkong hadien ka jingshah weng ne suspend Syiem noh ïa u Pa’iem Nangtei Syiemïong. Ha ka jingïalang, ki dkhot ka Executive Dorbar, ki Myntri, ki Lyngdoh ryngkat ki paidbah jong ka Hima Langrin Syiemship ki la shim ïa ki rai ban pynthymmai bad pynduh noh ïa ki katto katne ki aiñ kiba rim bad buh noh da kiba thymmai khnang ba ki kam hapoh ka Hima kin long kiba ïaid beit ïaid ryntih nange shakhmat.
U bah B.H. Syiemiong, Acting Syiem jong ka Hima Langrin ryngkat u bah Wadladkyrpang Lyngdoh Langrin, Secretary ka Hima Langrin haba kren ha ki lad pathai khubor hadienn ka jingïalang ki la ong ba ka jinglum ïa kane ka Dorbar ka dei hadien ba u bah B.H. Syiemiong ula shimti ïa ka kam kum u Acting Syiem jong ka Hima Langrin bad ha ka jingshimti jong u, u la lap ïa shibun ki jingduna bad ki jingbakla kiba har rukom kiba ïa dei bad ka shynshar khadar hapoh ka Hima bad ha kane ka Dorbar ba la pynlong ki la ïoh ban ïa kren ïa shibun bah ki mat ryngkat da ka jingïamynjur lang ki paidbah ka hima ha kaba ka la long ka jingrai kaba ïaid beit ïaid ryntieh na ka bynta ban wanrah ïa ka synshar khadar kaba khuid ba suba hapoh ka Hima Langrin baroh.
Haba ïathuh shaphang ka jingpynlong Dorbar, u bah Syiemïong ula ong ba ha ki snem ba la leit noh ïa ka Dorbar Hima la pynlong tang da ki Sordar, ki Secretary Shnong, ki Myntri, ki Lyngdoh bad khlem da ai bynta lang ïa ki khun ki hajar jong ka Hima ban shong Dorbar, hynrei kaei kaba sngewtynnad ka long ba ha kane ka kynti ba mynta ha ka jinglong u Acting Syiem jong u bah B.H. Syiemïong la weng noh ïa kata ka aiñ bad la wanrah da kaba thymmai ba ha ka Dorbar jong ka Hima baroh ki shynrang kiba la kot ïa ka 18 snem shaneng ki lah ban wan shong Dorbar. Namarkata, “ki paidbah ki la pynpaw ba naduh mynta kim kwah shuh ba u Syiem Nangtei Syiemïong un dang wan biang ha ka khet ban long Syiem hynrei ki la kwah noh da uwei pat”, ïathuh u bah B.H. Syiemïong.
Ha kane ka sngi, u bah B.H. Syiemïong u la ïoh ruh ban kren ha kaba ïa dei bad ki jaka puta kumno ban pynwandur na ka bynta ka bhah pisa tyngka ïa ki jingmih napoh kane ka Hima kiba dei hok ban ïoh pdiang hapoh ka Hima Langrin bad shibun kiwei de ki rai kiba la lah ban ïa mynjur da ki khun ki hajar jong ka Hima kiba la wan ha kane ka Dorbar.
Hadien ka jingshimrai, ki paidbah ka Hima ki la ïoh ruh ban ïa soi ïa ki kyrteng jong ki kum ka dak ba ki la ïa ka jingkyrshan bad mynjur ïa ki mat ba la ïa kren ha ka Dorbar Hima.
Ïa ka jingïalang, ka jingkren pdiang bad jingkren khublei la ïoh na u B.H. Syiemïong, Acting Syiem jong ka Hima Langrin.