Shillong, K’lyngkot, 10: Ka Khasi Hills Autonomous District Council (KHADC) haduh mynta ka dang ap ia ka kaiphod jong ka Delimitation Committee kaba la pynlong ia ka jingpynsngew paidbah ha kylleng ki shnong kiba hap hapoh u pud u sam jong ka District Council, kata ha East Khasi Hills, West Khasi Hills, South West Khasi Hills, Eastern West Khasi Hills bad Ribhoi District naduh ka 21 tarik, Naiwieng haduh ka 13 tarik Nohprah, 2023.
Ka jingthung jong ka Executive Committee ka KHADC ia ka Delimitation Committee ka long ban pan jingmut bad pan ia ki jingsngew na ki paidbah ha kaba iadei bad ka jingthmu jong ka District Council ban pynkhreh ia ka Delimitation Bill na ka bynta ban pynbeit ryntih ia ki 29 tylli ki Constituency kiba hap hapoh ka Khasi Hills Autonomous District Council.
U Dy. Chief Executive Member (Dy.CEM) ka KHADC Bah Pynshngaiñ N. Syiem ha ka jingiakren bad ki lad pathai khubor u la ong, “ka Executive Committee ka la bud ryntih ia ki kyndon baroh namarba u snem 2013 ha ka por ba ngi la wanrah ia ka Delimitation shwa ba ngin thaw ia ka Delimitation Committee ngi ïoh shwa ia ka jingmynjur na u Lat. Mynta ruh kumjuh hi, hadien ba la ïoh jingkynthoh na ki shnong, ki riewshimet ki pynpaw ba ka jingdon jong ki nongthep vote hapoh ka Constituency ka iapher kawei na kawei. Ka Mawlai Constituency ka don 50 hajar ngut bad ka Mawkhar-Pynthorumkhrah Constituency ka don 17-18 hajar ngut ki nongthep vote. Ka Laban Constituency ka don tang kumba 13-14 hajar ngut ki nongthep vote. Ngi donkam ban pynbeit ryntih biang ia ki shnong ha ki Constituency bapher bapher.”
“Mynta ka Committee ka dang pyntyllun shakhmat ban bishar bad ban nujor ia ki shnong bad kam don kano kano ka bym long katkum ki kyndon. Haoid, ngim pat don ia ka Rules of Delimitation Committee ban mynjur hapoh ka Ingdorbar Thawaiñ bad ia kane ngi dang pynkhreh mynta namar ban pynbeit thymmai ia ka Assam & Meghalaya District Council Rule kam mut eh tang ia ka Delimitation hynrei ka iadei ruh bad ki kam kiba iadei hapoh ka Ingdorbar. Ngi dang hap ban pynbeit thymmai bun kiei kiei,” u la ong.
Haba kylli, halor ka jingshah ujor jong ka KHADC hapoh ka Ingbishar halor kane ka jingpynbeit ryntih ia ki Constituency, u Dy. CEM u la ong, “ngan ym lah ban kren eiei ia mynta bad ka shong ha ka jingsngew jong ka Ingbishar. Ngi la iaid katkum ki kyndon aiñ.”
“Shwa u 2013, ia ka Delimitation la leh tang da ka Executive Committe hynrei ha u snem 2013 u Lat u la bthah ba dei ban da leh bniah bha khnang ba kan ym don kano kano ka jingleh thurmur,” la pynshai u Dy. CEM.
