Rah nam lahduh ka Mawkhyrwang SC, ka Rangblang ‘A’ S&CC bad ka Sakwang SC ha ka 1st MLA Cup 2022
Mawkyrwat, ‘Naiwieng 06 : Ka Mawkhyrwang Sports Club, ka Rangblang ‘A’ Sports & Cultural Club bad ka Sakwang Sports Club ki long ki lai tylli ki kynhun kiba la rah ïa ka nam lahduh ha ka jingïakhun phainal ha ka lympung ïalehkai kaba dei jong ka 1st MLA Cup 2022 ba la pynïaid da ka Maw-kyrwat Youth Development Association (MYDA) hapoh madan Saitsnad, Mawlangwir, South West Khasi Hills District.
Haba phai ha ka jingïalehkai kaba dei ha ka Volleyball, ka jingïakhun phainal ka dei hapdeng ka Mawkhyrwang SC bad ka Mawsaiñ SC bad ïa ka nam lahduh la rah da ka Mawkhyrwang SC ha kaba ka la ïoh da 3 – 1 set. Katba ha ka jingïalehkai Basketball pat ka Rangblang ‘A’ S&CC ka la rah ïa ka nam jop da kaba ka la tam noh da 26 – 14 basket pyrshah ïa ka Rangblang Sohsynñiang SC.
Ha ka jingïalehkai kaba khadduh pat kaba dei ha ka jingïakynjatbol ka la long ka jingïalehkai kaba kham itynnad shuh shuh namar ka jingkyrshan jong ki paidbah ruh ka la nangrhem bha ha kaba ka jingïaleh ka dei hapdeng ka Sakwang Sports Club pyrshah ïa ka Jakrem Sports Club. Haba phai ha ka jingïalehkai kat haduh ba kut jong ka la sakhi ba ka Sakwang SC ka la ïoh ban pynliem noh pyrshah ïa ka Jakrem SC da 3 – 1 kol ha kaba ïa ki kol jong ka Sakwang SC la thep da u Jonnywell Wanniang ha ka minit kaba 3 bad kaba 70 bad ïa kawei pat ka kol la thep da u R. Wartde ha ka minit kaba 25.
U bah Renikton Lyngdoh Tongkhar haba kren kum u kongsan ula pynpaw ka jingsngewkmen bad ka jingsngewnguh ïa ki samla kiba dei ki nongkitkam jong ka Mawkyrwat Youth’s Development Association (MYDA) kiba lyngba kane ka lympung ïalehkai kynjatbol ki don ka jingthmu kaba khraw na ka bynta ki samla ka dong ka thaiñ ban pynurlong ne ban rah lyngba da ka jingshlur jong ki da ka jingïatreilang para samla khlem pan jingïarap na ka sorkar wat tang shi tyngka ruh ne na kino kino ki jingpynlut na ki skhim sorkar lane na ka MLA Scheme hynrei dei lyngba da ka jingtrei shitom jong ki ki la ïa pynmih pisa hi da lade kum ka association bad kaba la kot kumba T. 5 lak.
“Kum ka association ka la jied ïa kane ka lynti khnang ba ki samla kin ïoh lad ban pynpaw ïa ki sap ki phong ki jong ki, kiba kynthup ïa ki ‘rang bad ki ‘thei samla jong ka thaiñ ha ki lai tylli ki jaid jingïalehkai kata ka Volleyball, Baksetball, bad ka jingïalehkai kynjatbol”, ong u bah Renik.
Ha kajuh ka por u bah Renik u don ka jingkyrmen ba na ka liang ki samla lyngba ka Mawkyrwat Youth’s Development Association (MYDA) kin dang lah ban ïai bteng ban pynlong shuh shuh nangne shakhmat ïa kum kine ki jaid jingïalehkai kiba kham heh ki khusnam khnang ba ki samla jong kane ka dong ka thaiñ Mawkyrwat kan nang kiew ha ki kam ïalehkai.