Nongstoiñ, Jymmang 22: Ka kynhun ïalehkai jong ka Nongstoiñ Cules Football Club na West Khasi Hills, ka la ïoh rah ïa ka nam lahduh hapdeng ki 32 tylli ki team jong ka lympung ïalehkai 2nd Invitation football tournament 2022 ba la pynlong da ka Nongjyllieh Youth Sports Social & Development Organization (NYSSDO).
Ka jingjop bad ka jingïoh rah jong ka Nongstoiñ Cules FC kaba dei kawei ka kynhun jong ka Barcelona Fan na West Khasi Hills, ïa ka nam lahduh ha katei ka lympung ka la wan hadien ba ka la pynliem noh da 1-0 kol ïa ka kynhun ïalehkai jong ka Dangpyrshang FC, kaba dei ka kynhun ki nongtrei karkhana kali napoh Sor Nongstoiñ. Kane ka jingïalehkai final ka la long ha ka sngi saitjaiñ ha madan Photumtong Playground Nongjyllieh West Khasi Hills.
Ha kane ka jingïalehkai ka Nongstoiñ Cules FC kaba la long ka lahduh, ka la ïoh ban khur ïa ka khusnam song pisa kaba Rs 18000 tyngka bad ka Dangpyrshang FC ka la ïoh ka khusnam song pisa kaba Rs 12000 tyngka. Kiwei pat ki khusnam ki long top scorer la rah da u Banraplang Marweiñ na ka Nongstoiñ Cules FC, Best Goalkeeper da u Pyrkhatbha Jyndiang na ka Sañiaw FC bad Best Player da u Wansiewdor Syiem na ka Dangpyrshang FC.
Ha shuwa katei ka jingïalehkai final, la ïoh ban pynlong ïa ka jingïalang kaba lyngkot ha kaba u bah Donboklang Sungoh Officer Incharge Nongstoiñ Police Station u la don ryngkat kum u Kongsan bad u Bah Pynshailang Kharbani kum u Symbud Kongsan ryngkat lang u Bah Medral Kharbani Sordar ka Shnong Nongjyllieh bad kiwei kiwei kiwei.
U Kongsan haba ai jingkren u la ai mynsiem ïa ka Club kaba la lah ban pynlong bad pynïaid beit ïa kane ka tournament.
