Mawkyrwat, Lber 25: Ka Myrtl Gospel Band ka dei kawei na ki 5 tylli ki kynhun ba rah ïa ka nam jop ha ka jingïakop rwai ne ka Rock Beat Contest, Mawkyrwat ba la pynlong ha madan jong ka Nativity Higher Secondary School, Mawkyrwat, South West Khasi Hills District.
Lah ban kdew ba ïa kane ka jingïakop rwai la pynlong da ka Seng Samla Shnong, Mawkyrwat (SSSM) ryngkat ka jingïatrelang ka Officers Club jong ka South West Khasi Hills District kaba ka phang ka sei, “Rock With-Out Drugs”.
Ki kynhun ne ki Bands kiba la wan ïashimbynta ki long ka Dark Abyss Band, ka Green Room Project Band, ka Myrtl Gospel Band, ka The Nomads Band bad ka Cursed Arrow of Monbhut Band.
Ha kaba kut jong ka jingïakop ka Myrtl Gospel Band ka la rah ïa ka nam jop ryngkat ka song pisa kaba T. 40 hajar, ka Cursed Arrow of Monbhut ka rah ïa ka nam ba ar ryngkat ka song pisa kaba T. 25 hajar bad ka The Nomads ha ka kyrdan ba lai ryngkat ka song pisa kaba T. 15 hajar. Shuh shuh ka la don ruh ka khusnam shimet kata nongtem kitar ba tbit u Sandonbor Lyngkhoi, nongtem drom ba tbit u Checkmanpaul Lyngkhoi, nongrwai ba tbit u Commander Lyngkhoi kine ki dei jong ka Myrtl Gospel Band, bad nongrem bass ba tbit u Damesamanbha Nongrum jong ka Cursed Arrow of Monbhut.
Ha kane ka sngi ka la don ruh ka jingtem sngewbha na ka Liza & The Band bad ka DJ Tenny.
Kiba la ïa donlang ha kane ka sngi ki long naduh u bah T. Lyngwa, IAS, Deputy Commissioner, South West Khasi Hills District, u bah L.T. Tariang, MCS, Additional Deputy Commissioner, South West Khasi Hills District bad kum u Secretary jong ka Officers Club, u Resource Person napoh ka Meghalaya Aids Control Society, bad kiwei de ki ophisar jong ka South West Khasi Hills District ryngkat ki nongwan ai mynsiem ïa ki kynhun tem.
