Nongstoiñ, Lber 25: Ka Khasi Students Union Nongtrai sepngi unit, ka la ïoh ban noh synñiang ïa kawei ka longïing kaba la mad ïa ka jingjia ba sngewsih ha ka jingpluh ding kat haduh ba ki jingdon jingem baroh, ki la shah bam duh noh ha ka ding. Kane ka ïing ka don ha ka shnong Lummawblei West Khasi Hills District.
Na ka liang ka Khasi Students Union Nongtrai Sepngi Unit marsien ïoh jingtip ïa katei ka jingjia, ha ka jingïalam u samla Slinglang Mawsor General Secretary, samla Kyntiewbor Nianglang Vice President bad kiwei ki dkhot, ki la leit ai jingïarap da ki tiar ki tar kum ki borti, ki jaiñ, ki dabor, lem bad ka song pisa ban kner ïa ka kti jingïarap sha kane ka longïing ba la mad ïaka jingjia sngewsih.
Haba ai jingkren na ka liang jong ki Nongïalam jong ka seng ka la ai mynsiem ba kin nym duh jingkyrmen, namar ka seng kan ïai don ha syndah bad ki. Ka seng ka la kular ruh ba kan ïai buddien haduh ba kin ïoh ïa ka lad jingïarap lyngba ka Emergency Relief fund na ka C&RD Mawshynrut Block. Ha kajuh ka por ka seng ka kyntu jur ïa ka Department ba dei peit, ba kin pynkloi ïa ki lad jingïarap ha ka por ba kham kyrkieh namar ba la jan ka aiom lyiur.
