Ïoh Nongkitkam thymmai ka HANM West Jaiñtia Hills District

Jowai, Lber 25: Ka Hynñiewtrep Achik National Movement (HANM) mynta ka sngi 25 tarik u Lber 2024 kala ïoh ban pyntian smai ïa ki nongkitkam thymmai ka HANM West Jaiñtia Hills District haka jingïalang ba la pynlong ha GHM Guest House jingkieng Myntdu.
Ïa ka jingïalang ha kane ka sngi la pynïaid da u Vice President Central Boby bah Bawan Nongsiej da kaba sdang shaw da ka jingrwai ieit Ri bad la pyntian smai ïa kitei ki nongkitkam ka seng da u President Rangbah u bah Lamphrang Kharbani, ha ka jingdonlang u bah Roiwan Sohtun uba dei u General Secretary Central Body bad ki dkhot ka seng kiba wan na kylleng ki Unit bad ki Circle bapher bapher.
Ha kane ka sngi ka seng kala ïoh lad ruh ban pynkup burom ïa ki nongïalehkai Sports jong ka Ri-Lum Jaiñtia kiba la jop ha ki kyrdan bapher bapher bad kyrpang ïa u Ngalong Sukhlaiñ ba shong ha Memory Colony, Jowai uba don ka jingtlot ha ki kjat ki bym lah ban kyrshan ïa ka long rynieng jong u hynrei u long pat uba trei shitom ban ïoh pyndap bam ïalade bad ïala ka ïing ka sem jong u da ka kam shna Mobile.
Kitei ki nongkitkam thymmai ka seng HANM West Jaiñtia Hills District ki kynthup ïa President samla Wankishwa Mawlong, Working President samla Damehi Dkhar, Vice President samla Max C. Pasi, Secretary samla Robel Pakma, Assistant Secretary samla James Syiemlieh bad u Arki Lytan, Education Secretary samla Thepmon Patwet, Organizing Secretary samla Seimon Sutnga, Publicity Secretary samla Kijuhi Sukhlaiñ bad u Finance Secretary samla Rimitre Lakiang.
U bah Roiwan Sohtun haka jingkren ula kyntu jur ïa ki dkhot ka seng ban kin pynbor ïa ka sorkar ba kan pyntreikam ïa ka ILP, khnang ba ki mynder kim ïoh lad ban wah suhthied kum ki trai shnong hapoh ka jylla bad kan long ka lad jingïada ïa ka khyndew ka shyiep,
Ka seng da ka jingthmu ba bha na ka bynta ka lawei ki khun samla kala plie kumjuh ïa ka Employment Cell ban peit bniah ha ka rukom pynïoh kam ïa ki khun samla ka bri u hynñiewtrep.
Ula ong ruh ba ka Ri India ka dei ka Ri synshar paidbah (Democracy) kumta ka don hok ban pynbor ïa ka sorkar da kaba seng ïa kino kino ki kynhun seng bhalang. Ula kren diaw kumba long mynta ki dukan ba heh hapoh ka Ri-Lum Jaiñtia la dei trai beit da kiwei ki pat ki jaitbynriew kiba dei ki mynder ri, kumta ka donkam ïa ki dkhot ka seng ban leit mih sha ka District Council ban dawa ba kim dei ban ai NOC sha ki briew ba nabar.