Pyrshang ai jingmyntoi ka tnat Housing tang ïa kawei ka company shna tin, ong ka HYC

Shillong, Risaw 01: Ka Hynñiewtrep Youth Council (HYC) ha ka sngi Ba-ar, ka la ong ba ka Notice Inviting Quotation (NIQ) ba la pynmih da ka Directorate of Housing ha ka 10 tarik Nailur, ka pyni ïa ka jingleh bymhok (Manupulation) bad jingpyrshang ban ai jingmyntoi tang ïa ki katto katne ki company ne ki nongshna tin ha Meghalaya ba kin pynpoi ïa ki Aluminium Roofing Sheet sha ka Tnat kaba shongdor haduh T.69,65,00,000.
Ha kaba iadei bad kane na ka liang u President ka HYC u Bah Roykupar Synrem ula ong ba ki kyndon ba la buh da ka NIQ ki dei kiba la shna ha kata ka rukom kaba pynsngew ba ka tnad ka la ai kabu ïa ki briew kiba don jingïadei ba ïajan bad kiba bat ïa u lakam ka synshar khadar ba kin ïoh ïa ka contract.
U la ong ba ki kyndon kyllum ha ka NIQ ka ong ba tang ki nongsengkam (Entrepreneur) kiba mihkhmat ïa ki karkhana kiba don ïa ki unit ba pynmih ïa ka mar/karkhana ha ka Jylla kiba lah ban ïashimbynta ha ka jingïathong, kampher la kine ki nongsengkam ki don ne em ïa ka jingtbit ha ka jingpynmih ïa ka mar ne kam shalan, ka dei ka bym donkam satia, ula ong.
Halor kane u Bah Roykupar ula ong ba ha ka technical bid ruh, ki kyndon ïa ka jingdon pisa jong ki nongthong kam la pyn wan ha kata ka rukom ka ban ai jingmyntoi ïa u/ka briew da kaba buh ïa ka kyndon ba ka jingïoh kamai ba shisnem (Annual Turnover) la buh ba kan long tang T.1 klur katba ha ka NIQ jong ka 11 tarik Rymphang 2022 na ka bynta ka contract kaba shongdor T.20,00,000,00, ka jingdonkam jong ka jingïoh kamai ba shisnem lah ban buh ym dei ban duna ïa ka T.10 klur na ka bynta ban ïoh ïashimbynta ha ka jingïathong ïa ka kam ban pyntrei.
“Kine ki kyndon ha ka NIQ ki la pynsngew artatien halor ka jinglong shai ka rukom pynïaid ïa ka jingthied ïa kine ki tin sop ïing bad lehse ka lah ban don ka jingpyrshang na ki bor khmih ban rieh ha lyndet kine ki kyndon tang ban ai jingmyntoi ïa ki company ne nongsengkam ba don jingïadei ba kin ïoh ïa ka contract,” ula ong.