Shah ktah ki Hynñiew tylli ki shnong ha EJHD ba duh bording, ujor ka JNC- 7 sha u SDO

Khliehriat, Ïaïong 14: Ka Jaiñtia National Council JNC- 7 Chnong Circle ka la pynpaw ïa ka jingsngewkhia halor ka jingduh bording kaba ju jia ka ba la neh slem, kaba ktah ïa ki Hynñiew tylli ki shnong ha East Jaiñtia Hills District bad mynta ka sngi ka seng ka la leit aiti da ka jingujor ha u Sub-Divisional Officer (SDO) jong ka Meghalaya Power Distribution Corporation Limited (MePDCL) Moowakhu EJHD.
Ki Hynñiew shnong kiba shah ktah ha ka jingduh ka bor ding ki kynthup ka shnong Moolamanoh, Moolang, Musniang, Musniangrim, Rangad, Lumputhoi bad Moonongtdu, ka seng ka iathuh ba kine ki shnong ki la mad ïa ka jinglip bording kaba man ka por bad kaba ju neh slem bha, kane ka jingduh ka bor ding ka ju neh bun kynta bha bad ong ruh ba wat hapdeng ka jingpynbiang bording kaba khlem ïahap, ki nongshong shnong ki dang ïoh ïa ka bill bai bording kaba rem.
“Ka seng ka buh ruh ka jingkylli ba na kaei ka daw kaba pynlong ïa ka jingduh bording ba khah-khah, hato dei na ka daw ka jingthut ha ki jingtei ne ki jingthut kiba ïadei bad ka jinglong ka suiñbneng ne kiba pynlong ïa kane ka jingduh bording kaba ju jia man ka por?. Kane ka mat ka la ktah khamtam eh ïa ki samla pule kiba pynkhreh ïa ki eksamin,” ong u kyrwoh.
“Ha ka jingïakren ba ki nongïalam ka JNC, na ka liang u SDO u la pynthikna ïa ka seng ba ïa kane ka kam yn sa shimkhia bha bad yn sa pynbeit noh mardor, u la pynthikna shuh shuh ba kum kine ki jingjia kin ym shah ban jia biang bad ka JNC ka la kyntu ïa ka MePDCL ban pynthikna ba ka jingsiew bai bording kan ïadei bad ka jingpynbiang bording bad kyntu ruh ïa ka tnat bording ba kan shim ïa ki lad ki lynti ban pynbeit kloi ïa ka jingpynbiang bording da kaba biang bad lada kan ïai jia kumne ka seng kam sa shim pat da kiwei ki lad ba tyngeh,” ong ka kyrwoh na ka JNC.