Kyrngah u Chairman ka Green Tech ban leit sumar bad kyntaitban dih dawai

Shillong, Ïaïong 14: Ki MDC jong ka seng Voice of the people Party na Jaiñtia Hills ba kynthup ïa u MDC na War Central u Bah Jamshaphrang Pohtam, ka Kong Laia Khynriam MDC Mynso Nongjngi, nangta u Bah Nehemaia Lamare MDC ka Mukhla Ummawlong ha ka sngi Baar ki la leit ban ai ka jingkyrshan bad ai mynsiem ïa u Chairman ka Green Tech u Bah H B Nonglang uba la shah thngan mynta ha madan Malki la kumba 6 Sngi bad la ïaid ruh kumba 120 kynta kaba la sdang naduh ka 9 tarik mynta u bnai.
Lah ban pynkynmaw ba ki Nongïalam ka VPP naduh u President Rangbah u Bah Ardent Miller Basaïawmoit, u kyrtong MP u Dr B Myrboh, kiwei pat ki MDC ki la ïa leit ban ai mynsiem bad kyrshan ïa ki dkhot ka Green Tech kiba la ïakhih halor ka jingthmu shna Resort hapoh u Dewlynnong Lumpongdeng ha Umïam.
Haba kren bad u Secretary General u Samla Ritre Oo Lyngdoh u la ther tyngeh ïa ki kyntien ba la kren da u Symbud Myntri Rangbah ka jylla u Bah Prestone Tynsong uba la ong ba ka jingkhang ka Secretariat ka plie 24 kynta ban ïakren pynbeit hapoh ka meij, ha kaba u la pynphai kylla ba lada ka long kumta balei ba la phah kem bad thep jubor ïa ki dkhot hapoh Bus haba la ïakhih ha ka 9 tarik.
U la ong ba kat bym pat pyndam ïa kane ka project ne ka contract kin ym sangeh ka jingshah thngan wat hadien ba na ka liang ki doktor ka DMHO ki la ai jingmut ban rah sumar noh ïa u chairman sha Civil Hospital uba la tlot ka met na kane ka jingïakhih shah thngan.
Shuh shuh u Bah Ritre u la ïathuh ruh ba naduh ba sdang ha ka sngi ba nyngkong haduh kine ki sngi ym shym la don satia na ka liang ki bor pynïaid distrik, ne ki ADC kiba wan ban jngoh, ne wat na ka liang ki bor sorkar ruh.
“Haduh kane ka sngi ka sorkar kam pat ai ktien satia la ka shim ïa kano kano ka rai haba ïadei bad ka projek ne ka contract hapoh u Dewlynnong Lumpongdeng bad wat ki bor sorkar ruh, hynrei tang na ka liang ka DMHO kiba la wan ban ai jingmut ban rah sumar noh sha Civil Hospital, hynrei na ka liang ka seng bad u Chairman ngi la kyntait bad ngim treh hi ruh ban dih ki dawai, watba u la kem tlot bad hiar ruh ka BP,” bynrap u Secretary General ka Green Tech.