Shillong, Rymphang, 02: Ki nongshong shnong kynthup ruh ia ki nongpeit jong ki shlem pule kiba don ha Lady Veronica Lane, Laitumkhrah ha ka sngi Thohdieng ki la mih ban pyrshah ia ka jingthmu ban pynkynriah ïa ki nongdie madan kiba ju shong die jingdie harud surok jong ki bynta bapher bapher ka shnong Laitumkhrah.
Ka Kong Monalisa Wankhar kaba dei ka nongshong shnong, u Secretary jong ka Bethany Society bad ka Director jong ka Bethany Society ka Kong Bertha Dhar ha ka jingïakren bad ki lad pathai pathai khubor ki la ong ba kum ki nongshong shnong kim shym la ïoh jingtip eiei halor kane ka jingthmu jong ka Dorbar Shnong lane na ka Sorkar ban pynkynriah ïa ki nongdie madan sha kane ka dong.
Ki la ong, ba ka jingpyrshah ka long namarba ka surok ka long kaba khim bad kaba rit bad nalor kata, ha kane ka dong, ki don ruh ki skul kum ka Bethany Society kaba dei ka skul na ka bynta kiba don jingduna ha ki dkhotmet, ka Mary Rise Centre kaba dei ka skul na ka bynta ki khynnah ba don jingduna ha ka bor pyrkhat bad nalor kata ka don ruh ka jaka sumar khmat jong ka Bansara Eye Care.
Ka Kong Wankhar ka la ong, “kum ki nongshong shnong ngim shym la ïoh jingtip lane ka jingpynbna na ka Dorbar Shnong lane na ka Sorkar shwa ban shim ïa kane ka rai. Ngi long kumba iuh tdong bseiñ haba ngi ïohsngew ïa ka rai jong ka MLA ka Kong Ampareen Lyngdoh lem bad ki Dorbar Shnong. Ynda haba la tohkit la lap ba ka dei ka rai shimet jong ki hi.”
Haba pynpaw ïa ka jingbym sngew ïahap ïa ka rai ban khang ïa ki kali kiba ïaid lyngba na kane ka surok bad ban buh da ka por ïa ka jingïaid ki kali, ka Kong Wankhar ka la ong, “haba bun hi ki nongshah sumar khmat, bad ki briew kiba don jingduna ha ka met ki donkam ban shah wan buh ne shah wan shaw na ki jaka sumar. Ki mut ban pynïaid ïa ki nongpang shaduh ka Parking Lot ba ki thmu ban buh ha iew. Ha kano ka nongrim ki shim ïa ka rai kaba ngim lah ban mutdurï”
“Kum ki nongshong shnong, lada don kino kino ki jingjia basngewsih kum kein yn ïaid ki Ambulance ne ki kali pynlip ding namarba ka lynti ka long kaba la khim lypa, nalor kata kin buh sa ïa kata ka iew ha ka lynti ïaid kjat naei pat ngi ki briew ngin ïaid? ka la ong.
“Ka long kaba sngewsih ba ka Nongmihkhmat kam shym la pyrkhat lem ai ngi ki nongshong shnong bad ïa kiwei pat kiba shah ktah na kane ka rai bad ka Nongmihkhmat ka la shu pynbna hakdak ban pynkynriah noh ïa ki nongdie madan,” la bynrap ka Kong Wankhar.
Ka la ïathuh ruh ba ki nongshong shnong bad ki nongpynïaid ïa kitei ki shlem pule ki la phah da ka jingthoh sha ka Deputy Commissioner ka East Khasi Hills District bad sha u Myntri Rangbah ka Jylla hynrei haduh mynta kim pat ïoh jubab eiei ruh em.
Ka Kong Bertha haba bynrap lang halor kane, ka la ong, “ngim pyrshah ïa ki nongdie madan hynrei ngi dang pyrkhat ka jingtap slep ïa ka nala ban pynlong lynti ïaid kjat kan pynsuk ïa ki khynnah skul kiba don jingduna ha ki dkhotmet, hynrei ngim poi pyrkhat ba kin wanrah pynban da ki nongshong die jingdie.”
