New Delhi, Rymphang 02 : Ka bha ka miat jong ki nongrep bad ka jingkyntiew ïa ki jingdawa mar ha ki jaka nongkyndong kalong kawei na ki mat ba kongsan jong ka mang tyngka ba shipor 2024-25 ba la wanrah da ka Myntri sorkar pdeng ba dei khmih ïa ka Tnat Kam Pla Tyngka, ka NirmalaSitharaman ha Parliament mynta ka sngi.
Da kaba kdew ba ki Nongrep ki long ki ‘Annadata’, jong ngi, ka Sitharaman ka la ong ba la kyntiew man ka por ïa ki dor MSP na ka bynta ki jingthung jong ki ‘Annadata’ . Ka Myntri Kam Pla Tyngka ka la ong ba man ka snem, hapoh ka PM-KISAN SAMMAN Yojana, la ai jingïarap pisa sha 11.8 klur ngut ki nongrep, kynthup ki nongrep kiba duna ka ïoh ka kot bad kiba rit ba ria, katba la ai ruh ka insurance na ka bynta ki jingthung sha 4 klur ngut ki nongrep hapoh ka PM FasalBimaYojana.
Ka la ong ba kine, nalor kiwei kiwei ki prokram, ki ai jingïarap ïa ki ‘Annadata’ ha ka jingpynmih ïa ki mar bam na ka bynta ka ri bad kiwei kiwei ki ri bad ka la bynrap ba la pynduh ïa ki jingkhuslai na ka bynta ka jingdon bam lyngba ka jingai ei ïa ki mar bam sha 80 klur ngut ki briew.
Ka mang tyngka kaba shipor 2024-25 ka kular ïa ka jingkyntiew ïa ka jingpynbha shuh shuh ha ki kam rep bad kyntiew ïa ka ïoh ka kot jong ki nongrep. Ka Myntri Sorkar Pdeng ba dei khmih ïa ka Tnat Kam Pla Tyngka, ka Nirmala Sitharaman ka la kular ban kyntiew shuh shuh ka jingbei tyngka shimet bad jingbei tyngka ka sorkarhadien ba ladep thung, kynthup ki jaka buh mar ba katkum ka juk mynta, ki lad pynpoi mar, ka jingshna ïa ki mar bad ka jingpynïaid iew ban pynthikna ka jingkiew sted ki kam rep bad kam pynmih marbam.
“Ka kam rep ka don ha ka khep jong ka jingplie lad ïa baroh, ka jingryntih, ka jingkiew shaphrang kaba sted bad ka jingseisoh. Kine baroh ki wan namar ki polisi kiba peit shuwa ïa ka bha ka miat jong ki nongrep, ka jingkyrshan ha ka ïoh ka kot, ka jingïarap ha ki jingeh lyngba ka dor bad ka insurance, ka jingkyntiew ïa ki teknoloji bad ki jingsaindur thymmai lyngba ki startup,” la ong ka Myntri kam pla tyngka ha ka jingkren jong ka.
Ka la ong ba ka PradhanMantri Formalisation of Micro Food Processing Enterprises Yojanaka la ïarap ïa 2.4 lak tylli ki SHG bad hynriew phew hajar ngut ki briew lyngba ka jingïoh shim ram.
Ka Myntri kam pla tyngka ka la bynrap ba kiwei kiwei ki skhim ki ïarap ïa ki sienjam ban pynduna ki jingduhnong hadien ba ladep lum ïa ki jingthung, bad kyntiew ïa ka jingpynmih ïa ki mar rep bad ki lad kamai kajih.
Ka Sitharaman ka la ong ba ka PradhanMantri Kisan Sampada Yojana ka la ai jingmyntoi ïa 38 lak ki nongrep bad ka la plie ki lad ïoh kam haduh 10 lak. Ka Myntri kam pla tyngka ka la ong ba ka Electronic National Agriculture Market ka la ïasoh bad 1361 tylli ki mandi bad ka ai jingshakri ïa 1.8 klur ngut ki nongrep lyngba ki kam khaii pateng ba shongdor T. 3 lak klur.
“Kine bad ka kyndon jong ki jingdonkam ba hakhmat eh ki la kyntiew ïa ka ïoh ka kot ha ki jaka nongkyndong. La lah ban weng ïa ki jingdonkam jong ki ha ka ïoh ka kot, kumta ka wanrah ka jingkiew shaphrang bad plie ki lad ïoh kam,” la ong ka Myntri Kam Pla tyngka.
ATMANIRBHAR OIL SEEDS ABHIYAN
Ka mang tyngka ba shipor 2024-25 ba la wanrah da ka Myntri Sorkar Pdeng ba dei khmih ïa ka Tnat Kam Pla Tyngka ka NirmalaSitharaman ka la ong ba yn thaw ïa ka rukom treikam ban kot sha ka ‘atmanirbharta’ na ka bynta ki oilseeds kum mustard, groundnut, sesame, soybean, bad sunflower.
Ka Myntri Kam Pla Tyngka ka la kdew ha ka jingkren jong ka ba kane kan kynthup ïa ki kam wad bniah na ka bynta ki symbai ba kham seisoh, ka jingpdiang ïa ki rukom rep kiba katkum ka juk mynta, ki jingpynïasoh bad ki iew, ka jingthied, ka jingpynbha shuh shuh bad ka insurance ïa ki jingthung.
NANO DAP
“Hadien ka jingjop ka pyndonkam ïa ka Nano Urea, yn pynïar ïa ka jingpyndonkam ïa ka Nano DAP ha ki jingthung bapher bapher ha baroh ki agro-climatic zone,” la ong ka Myntri Tnat Kam Pla tyngka ha ka jingkren jong ka.
