Pyntreikam ka sorkar ïa ka OMS ban khmih halor ka jingkiew dor ki tiar ba kongsan, Comingone Ymbon

Shillong, Jymmang 30: U Myntri ka tnat Food and Civil Supplies u Bah Comingone Ymbon ha ka sngi Thohdieng u la ong ba ka sorkar ka la pyntreikam ïa ka open market scheme (OMS) ban peit ban khmih ha kaba ïadei bad ka jingkiew dor ki mar ba kongsan ha kine ki 2 bad 3 bnai ba la leit.
Haba kren sha ki lad pathai khubor u Bah Ymbon u la ong badei na kane ka daw, ki mar ki mata kiba kongsan ki la hiar dor ha ki ïew ki hat laitnoh ki jhur naba bun ka jingshah ktah na ka jingjur palat u slap.
Haba kylli u Myntri u la ong, “Ka sorkar India ka don ka jaka ba la pynlang ïa ki mar ba kongsan ne buffer stock bad ka ju ai ruh sha baroh ki jylla lyngba ka open market scheme ha kaba ka dor jong u khaw kan long tang T. 22.50 shi kilo. Mynta ngi la sam lyngba kiba die lang ha ka jylla. Ki lah ruh ban die ha ki ïew bad kam don kano kano ka jingkhang na ka bynta kane.”
Halor ka jingrem palat ka bai kit, u Bah Ymbon u la ong ba ka sorkar ka dang pyrkhat ban thaw ïa ka jingkieng kaba thymmai najan ka dam Umïam ban pynbeit ïa kane ka jingeh.
“Ki la sdang ïa ka kam bad nga tharai ha kine ki 6-7 bnai kin sa lah ban pyndep ïa ka jingtei ïa ka jingkieng,” u la bynrap.
Shuh shuh u Myntri u la ong ba ka price monitoring system and vigilance team ki la don ha ka jaka ban peit ïa ka jingkiew dor ki tiar kiba kongsan ha ka jylla.
Ha kajuh ka por u Bah Ymbon u la ong ba ka jylla ka biang ka jingdon ka mar bam ba la pynlang bad ka la long ruh kaba la pynkhreh lada don kano kano ka jingmih na ka jinglong jingman jong ka khlam Covid 19 ba thymmai.