Shillong, Naitung 28: Ka Hills State People Democratic Party (HSPDP) State Youth Wing ka la ïoh ban pynthymai ïa ki nongkitkam jong ka Party.
Ha kane ka jingjied ïa ki nongkitkam ba thymmai jong kane ka party la wan ban ïadonlang naduh u President ba rangbah ka Party u Bah K P Pangngiang, u Bah Shakliar Warjri MLA u ba dei ruh u Myntri ka tnat ïalehkai ka sorkar Jylla, u Bah Methodius Dkhar MLA bad kiwei kiwei pat.
Ha ka jingïakren bad u Bah Korbarlang Syiemlieh President Youth wing u la ong ba ha kane ka sngi na ka liang ka party HSPDP ka la ïoh ban pynskhem ïa ki nongkitkam jong ka Youth wing ha kaba ha ki katto katne ki bnai na ka liang ka Youth wing kam shym la ïoh ban treikam.
U la ong ruh ba u dap da ka jingkmen haba na ka liang ka party ka la ïoh ban pynskhem ïa ki nongkitkam ba thymmai ha ka jingïadonlang naduh ki nongïalam ba rangbah ka party.
Ha kane ka sngi la jied ïa u Bah Korbarlang Syiemlieh kum u President, Bah Arkhelos Diengngan Vice President, Bah Pynshai Joel Dkhar Secretary, Finance Secretary Bah Alloysius Khardewsaw, Tresurer Bah Rijessing Warjri.
U Chief organizer Bah Bobby Kharshandi, Adviser Bah Shakliar Warjri MLA, Minister, Spokeperson Bah Pynbianglang L Marshillong, ki EC member ki kynthup ïa u Bah Elyon Dkhar, Khrawkupar L Nonglait, Shaihun Shangpliang, Clinton Shadap.
