Pynsngewthuh ka DMHP ïa ki paidbah ka shnong Mawsaw shaphang ka koit ka khiah
Mawkyrwat, ‘Nailar, 27: Ka District Mental Health Programme (DMHP) kaba hap ha ka jingpynïaid jong u District Medical & Health Officer (DM&HO), South West Khasi Hills District ka la pynlong ïa ka Awareness Programme bad jingsam ïa ki Kot ba thoh shaphang ka koit ka khiah halor ka jingmut jingpyrkhat kaba dei na ka bynta kiba la kham noh ka kyrta (Elderly).
Ïa kane ka program la pynlong ha Mawsaw Sub Centre kaba hap hapoh ka Mawthawpdah PHC ha kaba la shimbynta da kumba 20 ngut kiba la kham noh ka kyrta.
La pynïaid ïa kane ka prokram da ka kong Theresia Thyrniang kaba dei ANM jong kane ka Sub Centre bad bud da ki nongkren ba kynthup ïa ka kong D. Lyngkhoi, MLHP, kong A. Lyngkhei, (Clinical Psychologist) District Mental Health Programme bad la don ryngkat ruh ka kong E. Syiemiong, Case Registry Assistant.
Ka kong D. Lyngkhoi, MLHP ka la batai halor ka koit ka khiah kaba ïa dei bad ka met ka phad jong ki ba la kham noh ka kyrta. Ka la ong ba ki donkam ban khih ka met ka phad da ka leh ki ki jingkilanmet ba man la ka sngi, bam ki jingbam kiba tei bad pynïoh bor ïa ka met, thiah bha, pynaram bha ïa ka met, sngap thuh ïa ka bor jong ka met, ïada na ki jingpang, lehkhuid bad hap ban leit check-up man la ka por da kaba check ruh ïa ka Blood Pressure man la ka por. Ka la ban bniah ruh halor kumno ba ki dei ba kin sumar bha ïa lade ha ka liang ka met ka phad ka jong ki.
Ka kong A. Lyngkhei, Clinical Psychologist, ka la kren halor ka koit ka khiah jong ka jingmut jingpyrkhat. Ka la batai halor ka jingkordor jong ka koit ka khiah ha ka jingmut jingpyrkhat bad ki jingpang kiba ktah ïa ka jingmut jing pyrkhat. Ka la ong ba iwei na man la saw ngut ki elderly kiba lah noh ka kyrta ki ïoh ïa kane ka jingpng ha kane ka jingmut jingpyrkhat kaba kynthup ïa ka jingsngewsih sha ba palat (Depression), jingkhuslai (Anxiety) bad ka jingpang haba klet bad duna ha ka bor pyrkhat/Dementia.
Ka la ong ruh ba ki jingpang Depression ne jingsngewsih shaba palat ka long kawei na kiba kham kynrei bha ha kiba la kham tymmen. Ka la batai bniah halor ki dak ki shin bad kid aw ba pynlong ban ïoh ïa kine ki jingpang. Nangta, ka lah batai ruh halor ka jingdon jong ki lad jingïarap ne ïada ba ki lah ban ïoh lyngba ka ophis jong ka District Mental health Programme kba kynthup ïa ka counselling bad ki dawai na ka bynta kito kiba ïoh ïa ki jingpang ba ïa dei bad ka koit ka khiah jong ka jingmut jingpyrkhat.