Pynsngewthuh ka District Disaster Management Authority ïa ki lad ïada haba lynshop mariang ha Nongstoiñ College

0

Nongstoiñ, Ïaiong, 18: Ka District Disaster Management Authority (DDMA), West Khasi Hills District, Nongstoiñ hynne ka sngi ka la ïoh ban sam sha ki shispah ngut ki Volunteer Aapna Mitra ïa ki Emergency Response Kits, kiba long ki tiar ba lah ban pyndonkam haba don kino kino ki jingjia shah pynjulor ha ki bor mariang. Kane ka la long hynne ka sngi, ha ka prokram ba la pynlong hapoh Conference Hall jong ka Nongstoiñ College ha Nongpyndeng, Nongstoiñ.
U Additional Deputy Commissioner ka West Khasi Hills District u ba long ruh u CEO jong ka DDMA ka distrik, u Bah H.K Thabah u la leit sha kane ka prokram kum u kongsan ha ka jingsakhi lang jong u District Disaster Management Officer (DDMO) jong ka District, u Bah J. Mawthoh, u Deputy Controller Civil Defense u ba dei ruh u ophisar ba dei peit ïa ka prokram AAPDA MITRA hapoh West Khasi Hills District, u Bah W. Nonglang, u Sub-Inspector Civil Defense & Home Guards, Nongstoiñ, u Bah T. Tynsong, ki volunteer Aapda Mitra bad kiwei kiwei.
Ha ka jingkren ka jong u kum u kongsan, u Additional Deputy Commissioner, u Bah H.K Thabah u la pynpaw ïa ka jingkhublei ïa ka ophis jong u District Disaster Management Officer (DDMO), West Khasi Hills District, Nongstoiñ na ka bynta ka jingpynlong ïa kane ka prokram jong ka jingsam ïa kine ki tiar, ki ban ïarap shikatdei eh ïa ki volunteer ba la ïoh jinghikai ba kin ïoh pyndonkam, haba don kano kano ka jingjia shah pynjulor da ki bor mariang ne kino kino ki jingjia ba sngewsih.
U la kyntu ruh ïa ki Volunteer Aapda Mitra, ba kin sam lem ïa ka jingtip ba ki ïoh lum lyngba ki training sha la ki baieid bathoiñ bad hapdeng ka imlang sahlang kaba ki shong ki sah. Kumjuh ruh ban pyndonkam ruh ïa ki tiar bad ki buit kumba la shah hikai ha ki lyngba ki prokram hikai ka DDMA jong ka distrik.
U Bah Thabah u la ong ruh ba ki tiar ïa kiba la ïoh ban sam ha kane ka sngi, ki long kiba kordor shikatdei eh. U la kyntu jur ïa ki volunteer ba kin long kiba husiar ha baroh ki por bad ba kin ri sumar bha ïa ki tiar kiba ki la ïoh pdiang, kiba kynthup ïa ki life jacket, ki emergency light, ki tyllai, ki tari, ki tiar first aid, ki but, ki musari, ki pla bad kiwei kiwei.
Lah ban kdew hangne ba kiba bun na ki volunteer kiba la ïoh pdiang ïa kine ki Emergency Response Kits, ki kynthup ïa ki khynnah NCC bad NSS bad katto katne pat kidei kiwei pat ki khynnah samla jong ki dong bad ki shnong ka thaiñ.
Kiwei kiwei pat kiba la kren ha kane ka sngi ki kynthup ïa u District Disaster Management Officer (DDMO), DDMA, West Khasi Hills District, Nongstoiñ, u Bah J. Mawthoh, u Deputy Controller Civil Defence u ba dei ruh u ophisar ba dei peit ïa ka prokram AAPDA MITRA ha West Khasi Hills District, u Bah W. Nonglang bad u Sub- Inspector, Civil Defense & Home Guards, Nongstoiñ, u Bah T.Tynsong.

Leave A Reply

Your email address will not be published.