Shillong, Nailur 8 : Ka 8 tarik mynta u Nailur 2024 kan dei sa kawei ka sngi haka thup sah jingkynmaw (History) jong ka Balang Presbyterian jong ka Ri India hi baroh kawei, namar dei ha kane ka sngi ba ka Presbyterian Church of India ka la ïoh ban pynskhem sa ïa kawei ka Khasi Jaiñtian Prebyterian Synod kaba thymmai.
Ha kane ka sngi ka Presbyterian Church of India (PCI), ka la pynskhem ïa ka Synod kaba thymmai kaba la tip kum ka KJP Synod Pdeng, kaba la tyrwa ar snem mynshuwa da ka Presbyterian Churh of India ban thaw noh ïa kane ka Synod kaba thymmai ne ka Synod Pyrshang, kaba la mynjur bad sdang naduh ka 25 tarik u Nailur ka snem 2022 haka jingïaseng kaba la long haka Balang Pohkseh, Shillong.
Haka 8 tarik mynta u Nailur 2024, la pynskhem ïa ka Khasi Jaiñtia Presbyterian Synod Pdeng, haka Balang Presbyterian Laitumkhrah, Shillong, haka jingïaseng Synod kaba nyngkong eh jong kane ka Synod kaba 11 jong ka PCI, haka jingïaseng kaba la pynlong haka por mynstep, kaba la pynlong ha Windermere Estate, Umpling ha kaba da ki hajar ngut ki para riewngeit Khristan jong ki Balang Presbyterian kiba hap ha kane ka Synod kila wan ba sakhi lang ïa kane ka sngi sah kynmaw haka histori jong ka Presbyterian Church of India.
Ki kynhun shakri Blei ki ban hap hapoh ka Khasi Jaiñtia Presbyterian Pdeng ki kynthup ïa hynriew tylli Presbytery, arphew phra tylli ki District bad shispah hynñiewphew tylli ki Balang, ha kaba na ka thaiñ Mihngi naduh Puriang shaneng, naka Sepngi naduh Lawmei shaneng, na ka thaiñ shathie naduh Umsyiem shaneng bad kane ka Synod kaba thymmai ka dei kaba la phiah na ka KJP Synod Mihngi. Ki Balang kiba na kane ka Nongbah Shillong kiba hap hapoh ka KJP Synod Pdeng ki kynthup ï aka Balang Laitumkhrah, Nongthymmai, Umpling, Pohkseh, Madanrting bad ka Balang Laitkor.
Haka 8 tarik mynta u Nailur 2024, la pynskhem ïa ka Khasi Jaiñtia Synod Pdeng da u Moderator jong ka General Assembly jong ka Presbyterian Church of India u Rev. Joshua Jeme, da ka jingplie ïa u Mawsleit ba la shon ïa ka jingthoh ïaka tarik u bnai bad ka snem ba la pynskhem ïa kane ka Synod kaba thymmai jong ka Presbyterian Church of India, ryngkat jingwan sakhi lang ki nongmih khmat na ki phra tylli ki Synod na kylleng ka Ri India bad ki 17 ngut ki nongïalam ba paw khmat jong ka Presbyterian Church of India.
U Moderator ba nyngkong eh jong ka Khasi Jaiñtia Presbyterian Synod Pdeng la pynskhem ha kane ka sngi ïa u Rev. C Syiem, katba u Secretary u dei u Rev. SG Ryngksai bad haka jingïaseng haka nohphai sngi, la pyllait paidbah ruh ïa ki kot kiba la thoh halor ka riti treikam jong ki lai tylli ki kynhun jong kane ka Synod ba kynthup ïa ka rukom pynïaid kam jong kane ka KJP Synod Pdeng, ka rukom pynïaid kam jong Seng Kynthei KJP Synod Pdeng bad ka rukom pynïaid kam jong ka Seng Samla KJP Synod Pdeng.
